Makubunjwe imigomo ezolawula ohulumeni benhlanganisela
IMIDONSISWANO engenasidingo, kubangwa izikhundla emikhandlwini yomasipala enohulumeni abaxube amaqembu ikhombisa ukuthi abanye babaholi bethu bacabangela izisu zabo kuphela, kabanendaba nenhlalakahle yabantu baseNingizimu Afrika, ababakhetha. Le midonsiswano iqale ukugqama emuva kokhetho lohulumeni basekhaya lwango-2016, ngesikhathi i-ANC yehluleka wukudla umhlanganiso komasipala abakhulu esingabala kubo iNelson Mandela Bay, e-Eastern Cape; Ekurhuleni naseGoli, eGauteng.
Kuwuphindile lokho uKhongolose ngo-2021, wehluleka ukunqoba kulab’ omasipala asebebaliwe, waphinde futhi wehluleka ukuwina udede eThekwini, lapho kumanje ulawula ngosizo lwenhlanganisela yamaqenjana.
Empeleni ukuba khona kohulumeni benhlanganisela yamaqembu kakuyona into embi, njengoba kuvamile ukwenzeka emazweni anjengeGermany, i-Italy ne-Israel.
Kulawa mazwe, ukushintsha kukahulumeni ophethe kakuvamile ukuphazamisa izinhlelo zokuhlinzeka umphakathi ngentuthuko, ngenxa yokuthi izikhulu zikahulumeni ziyaqhubeka zenze imisebenzi yazo eyejwayelekile yokuhambisa izidingo ebantwini.
Kuleli, inkonyane isathuka isisinga; ukuketulwa kukahulumeni wamaqembu abusa ngokuhlanganyela, kwejwayele ukuba nomthelela omubi ekuhlinzekweni komphakathi ngezidingo.
Lokhu sekucacile kuMasipala iNelson Mandela Bay, eKurhuleni naseGoli, lapho sekuke kwaba nogingqigongqo izikhawu ezimbalwa, kuketulwa ezikhundleni izimeya zeDemocratic Alliance (DA), kufakwe eze-ANC, zibuye zibuyiselwe futhi ezeDA.
NgoLwesine nje, kukhishwe ngevoti imeya yeDA eGoli, uDkt Mpho Phalatse, kwafakwa uMnu Thapelo Amad, weqenjana i-Al Jama-ah elinezihlalo ezintathu kulo masipala onamakhansela awu-270.
EThekwini khona, izinto zimapeketwane njengoba umhlangano wangoLwesine, obekufanele uqoke iphini lemeya namanye amalungu ekomidi eliphethe umkhandlu, ubhuntshile ngenxa yokuthi amakhansela e-ANC nawe-EFF kawayanga kuwona. Kunemizamo yokuketula imeya yalo mkhandlu, uMnu Thomas Kaunda, emhlanganweni ohlelelwe ikusasa ngoLwesibili.
Kwenzeka yonke le migilingwane yemibango yezikhundla nje, izinto kazihambi kahle eThekwini njengoba kucace bha nyakenye ngokungcola kwamabhishi ngenxa yokungalungiswa kwamapayipi endle emuva kwezikhukhula zangoMbasa (April) nyakenye, abethululela itshe lentaba olwandle.
Njengoba kucacile ngokhetho lomasipala lwango-2016 nolwango-2021 ukuthi sekuzoba yinhlalayenza ukungabikhona kweqembu elibusa lodwa, kufanele iphalamende liqhamuke nemigomo ezolawula ukusebenza kohulumeni benhlanganisela, ukuze kube nozinzo ekulawulweni kwemikhandlu, ohulumeni bezifundazwe nokazwelonke imbala.
Lokhu kumele kwenziwe ngokuphuthuma, kungenjalo ngeke ibekhona inqubekelaphambili ezweni.