Uqinisile uJabu (Pule) Mahlangu, iSundowns iyalibulala ibhola lakuleli
MHLELI: Ngicela ukuvumelana noJabu Pule Mahlangu uma ethi iMamelodi Sundowns inesandla ekuweni kwebhola eNingizimu Afrika noma ekubhedeni kweBafana Bafana.
Uma ubheka bonke abadlali ababatshazwayo kwiPremier Soccer League (PSL), bathathwa yiSundowns noma ingenayo indawo yabo.
Baningi abadlali engingababala njengoThamsangqa Sangweni, u-Oupa Manyisa, uGeorge Maluleka, uGeorge Lebese, Lyle Lakay – esimboleke iCape Town City – uMusa Lebusa, uRivaldo Kotzee, uPunch Masanamela, uLucas Sebone, Papi Zothwane noKoketso Mmotong eyamlanda ewumlilo kwiPlatinum Stars.
Laba badlali ibathenga kahle emakilabhini abo, abanye kasazi nokuthi baphelelaphi.
ISundowns ithatha umdlali ngoba ebatshazwa ekilabhini yakhe, emuva kwalokho ayohlala ebhentshini.
Empeleni, le kilabhu inqinda amandla amanye ukuze kuzohlala kuphumelela yona emidlalweni.
Sebengaphika nje abalandeli bayo, bagxeke, kodwa iqiniso bayalazi.
Akekho umdlali obatshazwayo noma ofunwa yiKaizer Chiefs yona ingamfuni. Isikwenze kaningi ukuthi ithenge umdlali ngoba isizwile ufunwa yiChiefs.
USipho Mbule ubeseqala ukungena egiyeni eqenjini lesizwe, yavele yamlanda.
Usehlala ebhentshini kuyo. Uma elitholile ithuba lokudlala, ufakwa ngesiwombe sesibili.
Yala ukuthi umdlali abatshazwe, uMbule besesiqala ukwethembela kuye kwiBafana. Uzobizwa kanjanike eqenjini lesizwe lowo mdlali?
ISundowns isiyiphundlile iSuperSport United ithatha abadlali bayo.
Kulaba badlali singabala yena uMbule, u-Aubrey Modiba, uGrant Kekana, unozinti uNonwen Williams noTebogo Mokoena.
Uma iSuperSport ike yaba nomdlali oseqophelweni eliphezulu, iyafika iSundowns imthathe.
IMaritzburg seyahlala ivika izembe ngenxa yayo njalo iSundowns, ehlala ithatha abadlali bayo abanohlonze, isebenzisa ukuthi ngeke benqabe ngoba badinga imali.
Engizama ukukusho wukuthi uJabu Mahlangu noNeil Tovey bayihlabe esikhonkosini.
Kusazolokhu kukhonya yona nje iSundowns ngoba inalo lonke uhlobo lomdlali. Kwamqeqeshi wayo akazi nokuthi adlalise bani ayeke bani.
ULesedi Kapinga ngabe uphesheya kwezilwandle, kodwa sewaphenduka isihlwele kwiSundowns.
Ngamuzwa uBongani Miya ephambuka emoyeni ethi umqeqeshi uGavin Hunt uphaphalazile uma ethi iSundowns ibulala ibhola wangena uGcwanini wathi akayinqobe yonke imidlalo ebese ehlulwa iSundowns kuphela.
Empeleni mfo kaMiya, abadlali engabe uphumelela ngabo uHunt, yilaba abephucwa yiSundowns.
Kumanje uDennis Onyango noKennedy Mweene babenza kahle kakhulu emapalini eSundowns, kodwa sebephenduke izihlwele.
Vumani iqiniso balandeli beSundowns, uPatrice Motsepe usemaqhingeni okuqumba phansi i-Orlando Pirates neChiefs kwiPSL.
Kangiyisoli nje iChiefs uma isipatanisa ngabafana abancane ngoba ekuthengeni ngeke yamelana neSundowns.
Ubobona ngoba uMotsepe uvele athi abadlali mabacazelane ngemali, yena ufuna indebe kuphela.
Ukuveza ngokusobala ukuthi akazile ngebhizinisi ebholeni, uze ngezinhloso ezithile.
Ngenxa yendlala, abadlali nama-ejenti abo bayavuma ukuya kwiSundowns, badlale kabili kathathu kuthi nya ngabo, bazidlele imali behleli.
Thina laba badlali sibadinga kwiBafana.
Thanda “Mnikaziwempuphu” Chonco KWESAKWAMTHETHWA