Masikhuthale ukugcina umlando womzabalazo
OkaLuphuzi usethi khumu kule ngosi, nisale kahle!
Okungapheli kuyahlola. Ukwanda kwamaqatha ogqokweni kusho ukuthi kufanele udelele abanye, nabo basiqobele sidle.
Ngiphilile saphilisana, kwamnandi ngezayizolo nakuthangi.
Namhlanje sengiyakushiya kwadedangendlale, ngenxa yokwanda komsebenzi.
Sithi isiZulu ungabi nomgolo, dedela abanye nabo bagiye baqephuze: Nisale kahle!
NAKHU ENGIVALELISA NGAKHO:
UMA sibuka umlando womzabalazo wenkululeko yabamnyama e-Afrika, e-United States of America (USA) nasemhlabeni jikelele, kunamagama othi uma uwakhumbula, umoya wakho ube phansi, kwesinye isikhathi uhlengezele izinyembezi.
Kulezi zigagayi ezafela inkululeko, singabala uPatrice Émery Lumumba waseDemocratic Republic of Congo (DRC) kuseyiZaire, owayifuqa impi yenkululeko, kanti uzothi angathatha izintambo zombuso ngoNhlangulana (June) 1960, izigilamkhuba zamakoloni iBelgium, nezincelebana zazo kuleliya lizwe, zamthumba ngoMandulo (September) walowo nyaka, zaphetha ngokumbulala ngesihluku esinyantisayo ngoMasingana (January) 1961.
Omunye umfeli womzabalazo wabamnyama, nokho esingezwa kakhulu ngaye eNingizimu Afrika, nguWalter Anthony Rodney, incithabuchopho nesidlamlilo saseGuyana esazalwa mhla ka-23 kuNdasa (March) 1942, sabulawa mhla ka-13 Nhlangulana 1980.
Lo somlando waduma ngencwadi ethi: “How Europe Underdeveloped Africa,” ekubeka kucace ukuthi izimpande zokuhlupheka nokuxhashazwa kwe-Afrika yinto yamabomu, okuhloswe ngayo ngamazwe aseNtshonalanga – adla izambane likapondo – ukuba aqole ingcebo yase-Afrika umathanda, siphenduke ondingasithebeni izizukulwane ngezizukulwane.
Yize iningi lethu lazi kabanzi ngeqhawe uSteve Bantu Biko, elabulawa ngesihluku ngo-1977, esinye sezigagayi ayehamba nazo, uMthuli kaShezi owayeneminyaka ewu-25 ngenkathi ebulawa ngokuphoswa esitimeleni sihamba eGermiston ngo-1972, akaziwa njengoba kufanele aziwe futhi ahlonishwe kuleli zwe.
UDlaba, owayehola abafundi e-University of Zululand, KwaDlangezwa, eMpangeni, eyisekela-mengameli leBlack People’s Convention, wabulawa ngumlungu wakwaLoliwe ngoZibandlela (December) 1972, ezama ukulwela omama abamnyama ababecwasa futhi behlukunyezwa yilo mlungu.
Kuyajabulisa nokho ukuthi uhulumeni wentando yeningi wamhlonipha ngendondo i-Order of Luthuli ngobuholi bakhe obuqotho emzabalazweni nasemidlalweni yeshashalazi.
Singemlibale u-Ahmed Timol, isishoshovu seSouth African Communist Party esabulawa mhla ka-27 kuMfumfu (October) 1971 ngamaphoyisa aseJohn Vorster, eGoli sineminyaka ewu-29 ubudala.
Phambilini amaphoyisa obandlululo ayeqambe amanga aluhlaza, athi uTimol wazibulala.
Okujabulisayo wukuthi la manga achithiwe wuphenyo olwenziwe ngo-2017, oluphakamise ukuthi izigilamkhuba ezithinteka kulolu daba kumele zibhekane nengalo yomthetho.
Njengomuntu osehlale eMlazi iminyaka ngeminyaka, isihluku sokubulawa kwabameli bosomzabalazo bakuleli lokishi – uGriffiths Mlungisi Mxenge ngo-1981 nowakwakhe uVictoria Mxenge ngo-1985 – ngesinye sezigameko ezinyantisa igazi zonya lwamaBhunu, ezingasoze zesuleka emiqondweni nasemimoyeni yethu.
Uke ucabange ukuthi izindawo eziningi kuleli zwe ziyile nto ongayibiza njengezizinda zezigameko zecala?
Lokhu ngikusho ngoba sike sibe namehlo abukhali ekuboneni nasekukhumbuleni izigameko nezenzo zansukuzonke zamacala enziwa kwabamnyama ngezikhathi zombuso wamakoloni nasemibusweni yonya lwabamhlophe kithina.
Uma ngihamba endaweni emaphakathi neKwaZulu-Natal, kunezikhathi lapho ngiyaye ngifikelwe wumunyu uma ngicabanga ngenkosazana, uPhila Portia Ndwandwe, eyabulawa ngamaphoyisa ngo-1988, ayigqiba epulazini thize e-Elandskop ngoba engenazizathu zokuyibeka icala ngoba inqabile ukuphenduka ibe ngumdayisi osebenza ngaphakathi embuthweni wezenkululeko, i-askari.
UPhila, owayaziwa ngokuthi nguZandi kuMkhonto weSizwe (MK), wayengumfundi waseUniversity of Durban Westville, eThekwini, eseyaba wuphiko lwe-University of KwaZulu-Natal (UKZN) ngenkathi ejoyina iMK.
Ubulawa nje, ubengaphansi kwenkakha uMuzi Ngwenya, eyayaziwa ngokuthi nguThami Zulu/uTZ, ababezinze eSwazini.
Ngenkathi lithunjwa leli qhawe, lalinengane eyayinezinyanga
ezimbili izelwe.
Usonkondlo uDk Don Mattera wencwadi ethi: “Memory is The Weapon” usigqugquzela ukungalokothi silibale imuva nomlando onzima njengabantu abamnyama.
Ngishaya le nhlabamkhosi ngoba ngilandela umkhuba omuhle wase-USA wokuhlonipha uDkt Martin Luther King Junior owabulawa ngo-1968, owayelwa nengcindezelo yabamnyama kuleliya lizwe.
Minyaka yonke, abantu base-USA bagubha usuku lokuzalwa lukaDr King owazalwa mhla ka-15 kuMasingana 1929, abalubiza ngeDr Martin Luther Jr Day.
Nathi lapha eNingizimu Afrika, silugubhile lolu suku ngendumezulu womcimbi odidiyelwe ngumqondisi wezobuciko eJoburg Theatre, uJames Ngcobo, ngokubambisana ne-American Embassy, ePretoria.
Masifunde sijule ngemvelaphi yokulwa nengcindezelo yomuntu omnyama, hhayi kuleli kuphela, kodwa emhlabeni jikelele.
AmaJuda akasilibali isibhicongo sokubulawa kwabakubo eGermany ngesikhathi sikaHitler, iHolocaust.
Minyaka yonke, mhla ka-27 kuMasingana, amaJuda agubha iHolocaust Memorial Day, ekhumbula usuku lapho khona amasotsha ase-Ukraine – ayengaphansi kweSoviet Union – avula amasango aseKL Auschwitz akhulula izindimbane zamaJuda ayeboshwe yiGermany.
Kumqoka ukukhumbula imuva ukuze singayeki ukulwela amaqiniso emvelaphi yethu yenkululeko.
Ukungakhumbuli ubunzima begazi elaphalalela inkululeko yabamnyama kuyokwenza lihlale libaqalekisa ngamashwa abengamele.
Thina yindlu emnyama masibe njengabase-USA, silokhu sicija izikhali zokukhumbula umlando wamaqhawe ethu, ukuze ifa lethu lingadliwa yizihlakaniphi.
*Bhedlindaba “VVO” ka Luphuzi Mkhize (PhD)
Umongameli/Umsunguli: we-Umsamo Institute
Isigodlo saseMlambomunye: School of Umsamo Wisdom.