Kuyintokozo ukwemukela ubuso obusha oSuthwini
KUYINTOKOZO enkulu kimina ukwemukela ubuso obusha ekilabhini.
Ngesikhathi ngithatha izintambo zokuhola le kilabhu emndenini wakwaSokhela, obekuhamba phambili kithina wukuletha uguquko ukuze bonke abayingxenye yoSuthu baziqhenye ngekilabhu yabo.
Silokhu siqhubeke njalo nokuqinisa zonke izinhlaka zokuphila kwekilabhu, kusukela kwezincane kuze kuyofika esikimini esikhulu.
Lokhu kuyingxenye yohlelo lethu lwesikhathi eside lokudlondlobalisa le kilabhu.
Sijabule ngokujoyinwa nguJody February noGuily Manziba.
Okuhle kakhulu ngoFebruary wukuthi uzofaka ukuncintisana ezintini kuVeli Mothwa, u-Olwethu Mzimela noSiyanda Khumalo, osemncane ngeminyaka, abasivimbelayo.
Sibone kumqoka ukuqinisa ezintini ngoba siyazi ukuthi umzuliswano wesibili wemidlalo yeligi uzoshuba kakhulu, ekubeni kusekhona neNedbank Cup esibheke ukwenza kahle kuyona.
SIMFISELA OKUHLE UMAKHAULA OZOJOYINA IBUCS NGESIZINI EZAYO
Umqeqeshi wethu uRomain “Fohloza” Folz usesitshele ukuthi weneme ngesimenzele khona.
Uthe umsebenzi usulele kuyena nabo bonke abadlali bethu.
Nginxusa bonke abathandi boSuthu ukuba babambisane nathi ekwesekeni umqeqeshi wekilabhu.
Kangithandi ukuthi abalandeli bethu bezwe izinto emakhoneni ngoba kwesinye isikhathi lokhu kudala ukuxokozela.
Le ngosi iyinkundla ekahle yokuneka konke okwenzeka ekilabhini.
Kuningi osekukhulunywe ngoMakhehleni Makhaula, ongukaputeni wekilabhu, okuthinta ukwehlukana kwakhe noSuthu.
UMakhaula simfisela okuhle kodwa njengoba ezojoyina i-Orlando Pirates ekusongweni kwale sizini. Simbonga kakhulu ngokuzinikela kwakhe oSuthwini.
SIBHEKE UKUKHIQIZA UKHILIMU WABADLALI EZINHLAKENI EZINCANE
Sijabule kakhulu ngokwamukela uReneilwe “Yeye” Letsholonyone, uMbulelo “OJ” Mabizela no-Andile “Sguda” Cele abazololonga amaqembu amancane ekilabhu.
Silande bona ngoba siwahlonipha kakhulu amagalelo abo kunobhutshuzwayo.
Siphinde saqinisa izinhlaka zokuthuthukiswa kwabadlali ngabalolongi abanohlonze okubalwa kubona u-Aubrey Vilakazi, u-Amanda Sithole, uBrice Petersen, uTaoni Banda noNqoba Mdladla.
Sethemba ukuthi bazokwazi ukukhiqizela ikilabhu abadlali abasezingeni eliphezulu.
* USandile Zungu unguMengameli wamaZulu FC.