UMQEQESHI UBUYISWE WUKULUNGA KWENKINGA YENKECE KWI-TTM
UNOKUZETHEMBA ngokuthi nakanjani uzokwazi ukuqhelisa emsileni weMotsepe Foundation Championship iTshakhuma Tsha Madzivhandila (TTM) uJohnny Ferreira ongumqeqeshi omusha wale kilabhu kaLawrence Mulaudzi.
UFerreira utshele ILANGA ukuthi okumbuyise kwiTTM wukuthi ngesikhathi ekhuluma noMulaudzi, utholile ukuthi izinkinga zemali sezixazululekile.
Phambilini wayehanjiswe yizona.
“Ngiphezu kwemizamo yokusayinisa abanye abadlali abazosiza ikilabhu ivike izembe.
“Uma ubheka, yithina sodwa esesidliwe emidlalweni ewu-10 kule sizini, okungelona irekhodi elihle.
“Okumqoka engikuzele kwiTTM wukuzofaka uzinzo.
“Kangisulanga ngoba kukhona obekungangenelisi kwiBlack Leopards, kepha izinto zazingahlangani ekubeni ubengiphethe kahle uDavid Thidiela.
“Ngigculisekile ngabaqeqeshi engibaficile kwiTTM futhi kasikho idingo sokulanda abanye ngoba inqola ibibhajwe ekutholeni abadlali abanesipiliyoni kuphela, okunye ngizobuye ngibhekane nakho uma isikhathi siqhubeka.
“Sinabadlali abawu-20 kuphela, yingakho ngifuna ukufaka abanye, okungcono sibe nesikwati esiwu-30 ngoba kuningi okusazokwenzeka uma isizini isiyophela,” esho.
Uthi emdlalweni neVenda FC bekungamele badliwe ngoba
bakwenze konke, kwasho khona ukuthi inhlanhla kayikho.
“Kumele abantu bakuqonde ukuthi iTTM njengoba ibinezinkinga zemali, abadlali bayo abaningi bebengajimi.
“Konke kuzocaca kahle kuleli sonto ngoba izinto sezihamba kahle.”
* KUZO EZALESI SIGABA:
IVenda FC igcine isayinise uRophney “Rover” Hlungwane, ophuma kwi-Emmanuel FC, inkontileka yonyaka nesigamu noBabatunde Adepoju waseNigeria obegijima kwiNyasa Big Bullets okuthiwa akalibheki ipali.
USimo “Govuza” Dladla ocija iVenda uvumile ngokuhlabana ngalo mgadli.
* NAMUHLA ngoMsombuluko iCape Town Spurs izokwemukela i-All Stars koweligi ngo-15h30 e-Parow Park Stadium, eCape Town.