Ujabule wabuyela nganeno benqoba
Umqeqeshi wePirates uthi kayikafiki la efuna khona
UJABULE wabuyela nganeno uJose Riveiro ongumqeqeshi we-Orlando Pirates njengoba ekholwa wukuthi ezakhe kazikafiki lapho efuna khona.
IBucs iguqise iMarumo Gallants ngo-2-0 koweDStv Premiership ngoMgqibelo ebusuku eRoyal Bafokeng Stadium, eRustenburg.
Amagoli kulo mdlalo avalelwe enethini ngoMonnapule Saleng noNdabayithethwa Ndlondlo, okube yiphenathi.
UNdlondlo uthengwe kuyona iGallants ngesizini edlule.
IBucs, eke yaba wukudla kwenduku emidlalweni emithathu ilandelana, isinqobe imidlalo emithathu ilandelana.
Nakuba kunjalo uRiveiro uthi ezakhe zisengenza kangcono kakhulu kunalokhu ezikwenza manje.
“Ikilabhu yethu ibiqinile kodwa ibingeke iqine ngaphandle kodonga lwethu lwasemuva.
“Ibingeke iqine futhi ukuba abagadli bethu bebengabuyi ukuzokwelekelela ngokumaka.
“Konke kuhambe kahle kodwa ngikholwa wukuthi singenza kangcono kunalokhu.
“Ngiyajabula sinqobile kodwa kasikafiki lapho engifuna khona.
“Kodwa-ke okuhle wukuthi abadlali bami bayazi ukuthi ungena esikimini ngoba kukufanele, kakukho ukwenzelela,” kusho uRiveiro.
Ebuzwa ukuthi usegculisekile yini ngendlela ezakhe ezihlohla ngayo amagoli, njengoba ubekhala ngokuba buthuntu kwazo phambi kwamapali, uthe: “Bengingaqambi amanga uma ngithi sibuthuntu futhi bengikhathazekile.
“Bengiba nokucasuka nokudumala ngezinye izikhathi.
“Sizame ngakho konke okusemandleni kuleli sonto (eledlule) ukucija abadlali bethu njengoba besiza kulo mdlalo.
“Sizama masonto wonke ukwakha amathuba angaphezulu kwezimbangi zethu.
“Nokho kakulula (emidlalweni) yize kusuke kuyilona isu esisuke sinalo.
“Besinenkinga enkulu yokuqobela enethini amathuba esiwatholayo kodwa kasizange sililahle ithemba, yingakho izinto zibukeka zihamba kahle.
“Namanje ngisasho, sisengenza
kangcono kabi, yikhona nje ukuthi kufanele siqhubeke nokusebenza ngokuzikhandla,” kusho uRiveiro.
www.ilanganews.co.za