URULANI UCHAZA NGOBUDLELWANO BAKHE NO-PITSO
UMQEQESHI weMamelodi Sundowns uRulani Mokwena uphumela obala ngobudlelwano bakhe noPitso “Jingles” Mosimane ololonga i-Al-Ahli Saudi yaseSaudi Arabia.
IDowns iguqise iSekhukhune United ngo-2-0 koweDStv Premiership ngoMgqibelo ntambama eLoftus Stadium, ePitoli.
Amagoli eDowns ashaywe ngoPeter Shalulile noCassius Mailula.
IDowns iqede lo mdlalo ingaphelele emuva kokuba uMarcelo Allende ekhishwe ngekhadi elibomvu.
Le wini yeDowns bekungeka-14 kulandelana.
UMokwena kuke kwaba namahlebezi athi akahoshelani kahle noMosimane abelokhu ezwakala sengathi umkhuluma kabi kwabezindaba.
Kuke kwasabalala imibiko ebithi uMokwena ubethi iDowns inqobe izinkomishi nje ngaphansi kukaMosimane, yingenxa yakhe.
Phezu lwalokho, uMosimane umbuyisile njengoba ubesebuya kwi-Orlando Pirates nakwiChippa United.
UMokwena uthe: “Ngizokhuluma ngijabule ngaye (uPitso) ngoba ngiyazi ukuthi abantu baseNingizimu Afrika bangathokoza uma ubudlelwano bethu bubaba.
“Kodwa abantu kabazi ukuthi uPitso ngimthatha njengomuntu engibukela kuyena, ufana nobaba kimina ngoba wenze umsebenzi wokuba ngubaba.
“Usondelene kakhulu nomndeni wami, uyindoda yeSundowns.
“Wenze umsebenzi omkhulu kule kilabhu futhi uthathwa njengeqhawe futhi uyohlala esemabhukwini omlando wale kilabhu.
“Bengilalele uMikel Arteta ekhuluma ngoPep Guardiola, nami ngeke ngikubalekele ukuthi ungifundise izinto eziningi, ngiyambonga ngalokho.
“Ungesekile wangifundisa, walenza ikusasa lami njengoba linjena manje.”
Uthi akakholwa ukuthi ngabe ulana akhona namuhla ukuba ubengekho uMosimane.
“Ngizizwa ngithobekile kodwa naye uyazi ukuthi ubenesikhulu isandla ukuze ngibe yilokhu engiyikho namuhla.
“Abantu kufanele banikwe izimbali besengakwazi ukuzemukela, ngeke nje ngibe namahloni ngalokho.
“Ngiyazi ukuthi abantu bafisa ubudlelwano bethu bungabi buhle kodwa ngeke kwenzeke lokho, futhi siqhelelene kabi nje nalokho,” kusho uMokwena.