UBUYELA KULELI UMDLALI WE-BAFANA OBEYIBAMBE E-IRAN
LINDA XIMBA
USEQOQA imithwalo yakhe, ubuyela eNingizimu Afrika umdlali weBafana Bafana ohlukane kabuhlungu nekilabhu yakhe yase-Iran, iFoolad FC, edlala kwiPersian Gulf Pro League.
ILANGA lithole ukuthi u-Ayanda Patosi ukhululwe ngenxa yokungaziphathi kahle njengoba wafika ngemuva kwesikhathi ababebekelwe sona ngenkathi le ikilabhu ilungiselela ukuqala kwesizini.
Nesikhulu seFalood FC sake sacashunwa emithonjeni yabezindaba sinengekile yisenzo saleli nxele laseKhayelitsha, eCape Town.
Ngenxa yokunonophala kukaPatosi emzimbeni, lesi sikhulu samfanisa nomdlali oyi-sumo wrestler, laba abaseJapan abakhuluphele abadlala umdlalo ofana ne-judo.
Yize kunamakilabhu akhona e-Iran, okuthiwa abemgaqele ngenxa yekhono lakhe, uPatosi usenqume ukubuyela kuleli.
Umthombo uthe: “UPatosi ubuyela eMzansi.
“Usalungisa indaba ye-visa besethatha indiza.
“Lapha e-Iran kabawubambi umshini, bafuna ukuqinisekisa ukuthi njengoba eseqoqa amasakana akhe nje, akayikweleti yini intela.
“Nakanjani uzofika kuleli sonto eliqalayo.
“Mathathu amakilabhu esisakhulume nawo futhi elinye lawo lizomthatha ngoba ungumdlali weqophelo eliphezulu, ngaphandle nje kwekhanda lakhe elibuye limbhedise.”
Kuthiwa iKaizer Chiefs, iSekhukhune United neStellenbosch FC yiwona amakilabhu akhombisa intshisekelo yokumsayinisa.
“Uma iChiefs neStellenbosch FC benza kancane, ungathuki uma iSekhukhune imthatha.
“Leya kilabhu inemali enzima kabi. Ubonile ithatha uVusi Letsoalo ebheke kwiChiefs kanti muva nje inunusele ngemali eshisiwe uKamogelo Mokotjo obedlala phesheya,” kusho umthombo.
E-Iran uPatosi ubesehlale iminyaka emine, esuka kwiCape Town City.
Phambilini wayedlala eBelgium kanti kwiBafana usebizwe amahlandla ayishumi nambili.
Ushiye kwiFoolad esegijime kuyona imidlalo ewu-82 kanti uqhulule amagoli awu-18.