KUTHISHWA U-EYMAEL NO-DYLAN KERR UKUHLENGA IGALLANTS
KUTHISHWA abaqeqeshi base-Europe ukutakula ezembeni iMarumo Gallants ebambe ibhuleki kwi-log yeDStv Premiership.
Umkhumbi weGallants ubukeka ucwila ngaphansi kwesandla sikaDan “Dance” Malesela ongumqeqeshi.
Kuvela ukuthi izikhulu zale kilabhu zifuna ukumkhomba indlela, zivale isikhala sakhe ngomqeqeshi wase-Europe.
IGallants yehlulelwe ekhaya yi-Orlando Pirates ngo-2-0 koweligi ngoMgqibelo eRoyal Bafokeng Stadium, eRustenburg.
Ukwehlulwa kweGallants kuthele usawoti esilondeni kule kilabhu njengoba ithishwa ukugencwa yizembe kwazise imiphumela emihle iyagqoza.
ILANGA lihoshe ngemithombo yalo ukuthi izikhulu zale kilabhu kazeneme ngemiphumela yakamuva.
Kuthiwa ngendlela isimo esiyisona, zihlongoza ukulanda uLuc Eymael waseBelgium.
U-Eymael uke wasebenza emakilabhini akuleli okuyiFree State Stars engasekho, yiPolokwane City nakwiBlack Leopards.
Omunye okuvela igama lakhe nguDylan Kerr ohlenge iSwallows ezembeni ngesizini edlule.
“Abaphathi kabeneme, kungenzeka noma yini njengoba uMalesela ebizelwe emhlanganweni ukuzochaza ukuthi yini ehlukile asengayenza uma izinto zibheda kanjena.
“Engikuzwile wukuthi le kilabhu izama ukuthola u-Eymael ukuba azotakula lo mkhumbi obukeka uzika.
“Kodwa-ke konke kuzocaca ngokuqhubeka kwezinsuku, nokho kakubukeki kahle ngoMalesela,” kusho umthombo.
Ethintwa, uKerr uthe nakuba ebengakaze akhulume nezikhulu zeGallants ngendaba yokuyoqeqesha le kilabhu kodwa kwejwayelekile ebholeni ukuthi izikhulu zithathe isinqumo zibuye zizisole ngaso.
UMalesela uwuqondise kubadlali bakhe umunwe njengoba ekhala ngokuthi bangokhanda limtshel' okwakhe.
“Uma ubheka imidlalo yethu edlule, konke sikwenza kahle besesibulawa ngamaphutha esiwenzayo.
“Inkinga wukuthi abadlali ubatshela into bona bazenzele eyabo.
“Ngeke siye ndawo uma sizoqhubeka kanjena.
Uma ubuka amagoli asingenelile, kube wubudedengu bethu, kasifuni ukumaka ngendlela.
“Kuzofanele sishintshe ukwenza uma sifuna ukusuka kule ndawo esikuyo ngoba sizibeke thina kuyona,” kusho uMalesela.