Iye yimpumelelo imidlalo yeNetball
ITheku libe yizingqwele zeKZN Netball Provincial Championships
IBE yimpumelelo imidlalo yeKwaZulu-Natal (KZN) Netball Provincial Championships eqale ngoMgqibelo yasongwa ngeSonto Ogwini Sports and Leisure, eGamalakhe, ePort Shepstone.
Lo mqhudelwano ubudlalwa yizo zonke izifunda kanti bekudlalwa ezigabeni sabesilisa nesabesifazane.
Emidlalweni yamanqamu bekududulana iTheku neZululand ngokwehlukana kobulili.
Izingqwele kube yiTheku ngo-33-25, kwabesilisa, kanti nakwabesifazane kuphinde kwakhonya lona elikabhanana, libhaxabula yona iZululand ngo-18-17.
Lo mqhudelwano bekungowokuqoka isikwati sesifundazwe samaKingdom Stars namaKingdom Queens azodlala kwiTelkom Netball League ezoqala ngoNdasa (March) eCape Town.
Le midlalo iye eCape Town nje, kuzokuthi ngoNtulikazi (July) iNingizimu Afrika isingathe okokuqala ngqa imidlalo yeNdebe yoMhlaba yeNetball, khona eKapa.
UMengameli weKZN Netball, uGugu Ngema (osesithombeni), uthi lo mqhude-lwano uhambe kahle kakhulu.
Ube esebongela abanqobile kanye nalabo abaqokelwe emaqenjini esifundazwe.
“Kugqame nabadlali abaningi abasha ababonakala bezohamba ibanga elide kulo mdlalo weNetball.
“Ngiyababongela abanqobile nalabo abaqokelwa emaqenjini esifundazwe azosimela kwiTelkom Netball League.
“Sibe nenhlanhla kulo nyaka ngokuthola abakwa-Aquelle abathembise ukuthi bazokuba ngabaxhasi bethu beziphuzo.
“Bathembise ukuthi bazokuba nathi kuze kuphele lo nyaka kanti uma konke kuhamba kahle bazoqhubeka nangonyaka ozayo,” kusho uGugu.
Ubonge noMnyango wezeMidlalo esifundazweni, oholwa u-Amanda Bani-Mapena.
Uthi lo mqhudelwano ubungeke ube khona ngaphandle komnyango.
“Umnyango udlala enkulu indima ekutheni lo mqhudelwano uqhubeke esifundazweni.
“Ngaphandle kwawo ngabe kayikho iNetball KwaZulu-Natal.
“Usiza ngezinkundla nokucija abaqeqeshi.
Uma siwubiza uyesabela ngaso sonke isikhathi,” esho.
Umengameli uphethe ngokuncoma imidlalo yabo ye-club development eqhubeka kuso sonke isifundazwe.
Uthi le midlalo idlala enkulu indima ukuthi umdlalo weNetball uhlale ukhona emehlweni abantu.
Kwi-club development kugxilwe kakhulu ku-U/13 no-U/17, abadlali abaningi abaphuma lapho bagcina sebemela isifundazwe kwiTelkom Netball League.
zondim@ilanganews.co.za