OMKHAYA BASHAYANE BAZE BABUKANA
UTAKULE ikilabhu yakhe sekuvalwe amehlo ukaputeni weRichards Bay elokhu iqhubeke njalo nokujabulisa abalandeli bayo.
IBay FC icazelane amaphuzu nomkhaya AmaZulu FC kuba ngu-1-1 koweDStv Premiership izolo ngeSonto ntambama, eKing Zwelithini Stadium, eMlazi.
UKatlego “KG” Maphathe utakule iBay FC sekuvalwe amehlo evalela igoli ngomzuzu ka-93, ecima igoli likaThabo “Section 10” Qalinge alivalele ngomzuzu ka-33, esiwombeni sokuqala.
URomain “Fohloza” Folz, ololonga uSuthu, uthi lo mdlalo bekufanele bawunqobe.
“Umdlalo besiwuthwele ikakhulukazi ngesiwombe sokuqala kodwa sehlulwa ngamathuba alula.
“Unozinti wabo ubasizile ikakhulukazi ngesiwombe sokuqala, ubesivimbile.
“Kodwa-ke kufanele sizisole thina, siyeke umdlalo kungowethu sayeka ithuba lokunqoba umdlalo ulula,” kusho uFolz.
UVasili Manousakis, ongomunye wabalolongi beBay, uthi uphoxekile ngendlela abadlale ngayo.
“Besingebahle neze kulo mdlalo ikakhulukazi ngesiwombe sokuqala, besenza izinqumo ezingezinhle.
“Besiphisana ngebhola kalula kangiyazi mina le kilabhu ebesidlala ngayo ngesiwombe sokuqala besingenaso isivinini.
“Ngiphoxekile ngendlela esidlale ngayo.
“Naphambili sibe nenkinga phambi kwamapali, besishweba amathuba okufanele engabe siwavalela enethini,” kusho uManousakis.
* Imiphumela yeDStv Premiership imi kanjena:
Richards Bay 1, AmaZulu 1; Chippa 1, Maritzburg 0; Marumo Gallants 0, Pirates 2; Swallows 0, SuperSport 0; Sundowns 2, Sekhukhune 0; Stellenbosch 2, Cape Town City 2, Galaxy 4, Arrows 0.
* EyeMotsepe Foundation Championship: UThongathi 1, Casric 2; Callies 1, Baroka FC 1; Venda 2, TTM 1; Platinum 0, Lions 0; Leopards 2, Tuks 2; Polokwane 1, Magesi FC 0; JDR 1, La Masia 1.