IBHEKWE NGABOMVU INKULUMO KAMENGAMELI AYIBHEKISE ESIZWENI
UCHAZA inkulumo kaMengameli Cyril Ramaphosa azoyethulela isizwe ngoLwesine njengemqoka futhi enzima kunazo zonke esezike zethulwa ngoMengameli baseNingizimu Afrika kusukela kwaphatha uhulumeni wentando yeningi umhlaziyi wezepolitiki ozimele.
UMnu Zakhele Ndlovu ofundisa izifundo zePolitical Science e-University of KwaZulu-Natal (UKZN), uthi uMnu Ramaphosa kuzomele enze konke okusemandleni akhe ukuthi inkulumo yangoLwesi-ne ibuyise ithemba ebantwini bakuleli njengoba eyethula ngaphansi kwezimo ezibucayi.
Uthe le nkulumo ifika ngesikhathi lapho abantu bakuleli isibame emphinjeni indaba kagesi, indaba yobugebengu nokuntuleka kwemisebenzi.
“Umengameli ubhekene nomqansa wokubuyisa ithemba elingasekho ebantwini kanti okunye wukuthi le nkulumo iza sekusele isikhathi esingangonyaka kube nokhetho lukahulumeni kazwelonke nabezifundazwe,” kusho uMnu Ndlovu.
Uthe okunye okuzokwenza kube nzima, wukuthi uMnu Ramaphosa uyethula nje le nkulumo, usanefu elimzungezayo elizokwenza i-EFF imthwalise kanzima uma isazoqhubeka nendlela eyenza ngayo ngesikhathi uMnu Jacob Zuma ebhekene nesimo esicishe sifane ngesikhathi engumengameli wezwe.
“Iqembu elifana ne-EFF lizozama ukugqama uma kuzoya ngendlela elenza ngayo kuMnu Zuma. Lokho kuzobeka uMnu Ramaphosa esimweni esingesihle ebantwini ekubeni esabhekene nalo mqansa,” kusho yena.
Uthe inkulumo kamengameli kumele ithumele umyalezo oqinile futhi ozoba nezinhlelo ezizothenjwa ngabantu bakuleli. Uqhube ngokuthi nakuba uMnu Ramaphosa ebhekene nefu elimayelana nezizumbulu zemali yase-United States of America (USA), ezebiwa epulazini lakhe iPhala Phala, eLimpopo, kodwa okumqoka wukuthi anikwe ithuba lokukhuluma nesizwe ngoba okuseqhulwini ebantwini, wukuzwa izinhlelo uhulumeni onazo ukubakhipha otakwini.
Okunye uMnu Ndlovu athi kungase kukhathaze abantu, wukuthi kuningi obekuthenjiswa nguyena uMnu Ramaphosa nabanye omengameli abangaphambili kwakhe kulezi zinkulumo zesizwe, kodwa osekuphele iminyaka kungenzeki. “Yingakho ngithi le nkulumo inzima kunazo zonke esezike zaba khona phambilini. Abantu bakhathele, bafuna izixazululo futhi ngokushesha,” kusho uMnu Ndlovu.
Uphawule nangodaba olusabalele lwezingquko zeKhabhinethi kaMnu Ramaphosa, wathi umengameli kumele akhethe abantu abazokwenza umsebenzi.
“Leli yihlandla lakhe lokugcina, ngakho akusekho lapho okumele akhethe nabantu ngenhloso yokubumba iqembu (ANC), kodwa sekumele akhethe abantu abazosebenza ngokuzimisela futhi abazoba yithemba labantu.
“Kumele akhethe abantu abazokwazi ukuqeda izinkinga ezibhekene nomphakathi,” kusho yena.
Uthe uMengameli Ramaphosa akusamele asabe ukuthatha izinqumo ezinqala manje ngoba i-ANC ibhekene nenkinga enkulu yokwehlelwa yisibalo sabavoti.
“Indlela izinto ezihamba ngayo, uRamaphosa angaba ngumengameli wokugcina ukuphatha ngaphansi kombuso we-ANC, ingayodwana. Maningi amathuba okuthi ngokhetho olulandelayo uma ebuya, kube sekuphoqa ukuthi ahlanganyele namanye amaqembu ukuze aqhubeke nokuphatha