IKHANSELA LITHENGELE ABAFUNDI UMFANISWANO NGEPHAKETHE LALO
LIKHUMBULE ekhaya ikhansela le-IFP, kuMasipala waseMsunduzi, linikelela abafundi baseSweetwaters Primary School, eMgungundlovu, okuyilapho laqala khona uhambo lwalo lwemfundo.
UMnu Mbongeni Shezi, ushaye ephaketheni lakhe, wathengela abafundi abayishumi umfaniswano wesikole.
Uthe ngabe akabenzi ubulungiswa njengomholi uma eshalazela abantu abamethembile baze bamthumela kwamasipala ukuyoba wumlomo nezindlebe zabo. Ngeledlule uhambele eSweetwaters Primary, eyodlulisela kothisha nakubazali umfaniswano awuthengele abafundi njengesithembiso sakhe.
Utshele ukuthi lesi sikole abeyonikela kubafundi baso, kulapho naye abunjwa khona, walolongeka, kuze kube ufika lapho ekhona namhlanje. Uthe ezemfundo yizona azibeke phambili ebuholini bakhe.
“Kangibanga nawo amandla okwenelisa bonke abafundi, kodwa laba abawu-10 abahlomulile, ngithemba ukuthi kuzobasiza lokhu abakutholile.
"Ngishaye ephaketheni lami, ngathenga lo mfaniswano ngoba ngingumholi ononembeza, ongashalazeli abantu abaholayo. Besingabheki ukuthi umfundi ozohlomula uzalwa emndenini waliphi iqembu lepolitiki, kodwa sibheke abaswele ngempela.
"Okumnandi wukuthi bonke laba abahlomule ngomfaniswano, bahlonzwe ngothisha babo njengabaswele, base bethumela uhlu lwabo nosayizi bomfaniswano wabo,” kusho yena.
Ekhuluma neLANGA egameni labazali, usihlalo wesigungu esilawula eSweetwaters Primary, uNkz Nompumelelo Ngubane, ubonge uMnu Shezi ngokuba nobuntu, abheke ukuthi laba bantu abaholayo ngabe yiziphi izinselelo ababhekene nazo.
Umfanise nekhwezi kubazali abethuleke umthwalo ngengcindezi abebebhekene nayo yokutholela izingane zabo umfaniswano wesikole.
“Iningi lezingane ezikulesi sikole liphuma emindenini ehlwempu, kangangoba ezinye zazo zikhuliswa ngogogo ngemali yempesheni njengoba zingasenabo abazali.
"Okwenziwe nguMnu Shezi kuhle kwazise naye ungowokuzalwa kule ndawo futhi uziqonda kahle izinselelo ezibhekene nabantu abaholayo.
"Sikholwa wukuthi nalezi zingane ezihlomulile sezizofunda zinokuzethemba zigqoke umfaniswano waphelela, zingaziboni zihlukile kunezinye esikoleni. Siye sibone ukuthi kuba nzima ukugxila kokufundwayo enganeni ezibona ihlukile kwezinye ngenxa yezimpahla ezigqokile,” kusho uNkz Ngubane.