Abe-ANC bathi bebenziwa opopayi ngolukagqamcishi
UMbalula uthi sesiphelile isikhathi sobuvila
UNOBHALAJIKELELE we-ANC, uMnu Fikile Mbalula, uthembise amalungu aleli qembu adele ilanga anikela enkundleni yezemidlalo eHammarsdale, izolo ngeSonto emcimbini kaKhongolose KwaZulu-Natal, wokugubha iminyaka ewu-111 kwasungulwa leli qembu ukuthi uMengameli Cyril Ramaphosa uzonaba kabanzi ngezinhlelo zokuqinisekisa ukuthi bayayinqoba impi kagqamcishi (load shedding) neyokuhambisa izidingo ebantwini.
Uwatshele ukuthi (beyi-ANC), bese bekhathele wukwenziwa opopayi ngodaba lukagqamcishi njengoba bebetshelwa lokhu, kodwa kuthi kusa ngakusasa, kwenzeke okunye.
“Yingakho siwubuholi be-ANC sikhethe ukuzibambela mathupha, saphakamisa ukuthi udaba lukagesi luthathwe njenhlekelele futhi kube nezinqumo ezithathwayo ukuze isheshe ilungiswe.
“Lokhu bekuchaza ukuthi sibhekane ngqo nenkinga futhi sibazise abantu ngeqiniso lokuthi kuzothatha cishe isikhathi esingangonyaka ukuze ilunge,” kusho uMnu Mbalula.
Uthe obekubakhathaza ngendaba kagqamcishi, bebetshelwa ukuthi sizokwehla isigaba esithile sawo, kuthi ngakusasa bavuke sesinyukile.
“Lokhu bekusiphendula abantu abanamanga emphakathini, yingakho singenelile sajuba ithimba nomengameli ukuba udaba lwe-Eskom luphendulwe inhlekelele,” kusho yena.
Uchaze lo nyaka njengowokuguqula izinto ngendlela abahola ngayo kuhulumeni, kusukela emazingeni aphansi kuya kuzwelonke. Uthe bazoqinisa uhlelo lokubheka labo ababajubile ezikhundleni zikahulumeni ukuthi basebenza kanjani, ukuqinisekisa ukuyiswa kwentuthuko ebantwini.
Uqinisekise izethameli zenkulumo yakhe ukuthi isikhathi sokuvilapha siphelile njengoba kumqoka ukuba babeke abantu phambili.
UMnu Siboniso Duma ongusihlalo we-ANC KwaZulu-Natal, uthe sekuyisikhathi sokushintsha izinto ukuze leli qembu livuseleleke. Ubalule ukubaluleka kokusondelana nokubambisana neNdlunkulu kaZulu namabandla, wathi abamba iqhaza ukubumba nokuvuselela i-ANC.
Uveze ukuthi nakuba bebeseka obunye ubuholi ngaphambi kwengqungquthela yokukhetha ubuholi be-ANC, ebiseNasrec, eGoli ngoZibandlela (December) nyakenye, kodwa sebeyabamukela ubuholi obukhona, obuholwa nguMnu Ramaphosa.
Uthe bayabuhlonipha futhi bayabeseka lobu buholi, kodwa kabazisoli ukuthi bona bebethwele ngeqoma uDkt Zweli Mkhize ekubeni ngumengameli waleli qembu. Lo mcimbi ubuhanjelwe wubuholi baleli qembu kusukela kuzwelonke kuya ezifundeni zeANC.
Uphothulwe ngokusikwa kukabhazabhaza wekhekhe nedili lomculo. Bekunandisa abaculi okubalwa kubo uMondli Ngcobo, iBig NUZ, uBabes Wodumo noKhuzani.