ITHOKOZELWE NGABANINGI INGOMA KALAGXABHA EKHALA NGONGIZWE MCHUNU
YESEKWE ngomasikandi ingoma ekhishwe ngumculi kamaskandi oyibhenanyawo, ekhala ngesenzo sikaNgizwe Mchunu sokuthuka abanye abantu.
ULagxaba Hadebe waseJolvet, wodumo lwengoma ethi “iPerfomance”, wesekwe ngabanye ozakwabo ngale ngoma esabalele ezinkundleni zokuxhumana, ethi, “Kancane Kancane Kuyavela”. Kule ngoma uthi kufanele uNgizwe atholelwe usizo ngoba ubona engaziphathi kahle. Utshele ILANGA ukuthi kufanele atholelwe usizo ngoba ukuhlasela kwakhe abantu, kushiya imibuzo emphakathini.
Kule ngoma yakhe ubala bonke abantu abathukwe uNgizwe, okungabaculi bemikhakha ehlukahlukene, abahleli bemicimbi nabelaphi bendabuko.
“Indlela asebathuke ngayo abantu, abanye ebahleba bese kuyaputshuka ekugcineni ahlazeke ezweni, kufanele athole usizo noma alulekwe ngokwenqondo ngoba kakukhombisi ukuthi izenzo zakhe ngezomuntu ophilayo.
"Lo muntu uxabana nabo bonke abantu, okusho ukuthi kancane kancane kuyavela ukuthi uyagula,” kusho uLagxaba.
Kule ngoma kunezinhlamvu ezithi, wamthukelani uMabalengwe, wawumthukelani uSomnandi, uKhuzani, uSomizi, uDkt 3 Seconds, uDJ Tira nabanye abaningi.
UThokozani “Somnandi” Langa uthi kuyajabulisa ukuthi sekukhona abaphumela obala, bebona ukuthi kukhona okushaya amanzi ngoNgizwe.
Uveze ukuthi kusamhlukumeza namanje ukuhlaselwa kwakhe nguNgizwe, owathi ujuluka ubala estudiyo, akazi lutho, kumele ayohlala nezingane ekhaya ngoba usemdala.
“Ngimdala kabi kuyena uNgizwe, le nto ayenzile yokungehlisa isithunzi ngisahlela ukuyilungisa ngokuthi ngihlale phansi nomndeni wakhe. Ngimdala, nginezingane, ngiganiwe, kufanele kuhlonishanwe,” kusho uSomnandi.
UKhuzani uthe le ngoma ikhuluma iqiniso futhi uyithokozelile. Uveze ukuthi sekukaningi eveza izenzo zikaNgizwe eziphazamisa impilo yabanye abantu.
“Kangisathandi ukukhuluma ngengxabano yethu nomkhaya (uNgizwe), kodwa le ngoma inhle kakhulu ngoba ikhuluma okwaziwa yizwe lonke,” kusho uKhuzani.
Ethintwa uNgizwe, uthe akaphendulani nabaculi abafuna ukuzigqamisa ngegama lakhe. ULagxabha uthe le ngoma yakhe ithengisa online.