IMambazo ikhumbula uShabalala ngemicimbi
Leli qembu lizonandisa ezindaweni ezahlukene
LETHULE ngokusemthethweni isonto elibizwa ngeJoseph Shabalala Week, iqembu lodumo likacothoza, iLadysmith Black Mambazo, lapho lihlele imicimbi eyahlukene ehambisana nokukhumbula umsunguli walo, uSolwazi Joseph Shabalala.
Leli sonto liqale ngomcimbi wesicathamiya obungoMgqibelo khona eMnambithi, lapho bekuboshelwe khona amaqembu ahlukene asezakhele igama kucothoza. Izolo ngeSonto kube nomunye umcimbi wokuhambela ithuna lale ngqalabutho nohlaka lwalo olubizwa ngokuthi “Amafa”.
Ngokusho kukaXolani Majozi ongumphathi waleli qembu, umcimbi wokuhambela ithuna likaSolwazi Shabalala bekungowokuqala uhlelo lokuthi liphendulwe indawo yokugcinwa kwamagugu eNingizimu Afrika.
“Ngokubambisana naMafa, besiqala uhlelo lokuthi ithuna likabab’ uShabalala libe yindawo yokugcina amagugu, abantu bakwazi ukulivakashela libe yisikhumbuzo ngemisebenzi yaleli qhawe,” kusho uMajozi.
Uthe namhlanje ngoMsombuluko bazohambela isikole esiqanjwe ngaye uSolwazi Shabalala, esikhona eMnambithi. Kusasa bazohambela ezinye izikole ezimbili afunda kuzona.
“Njengoba sazi ukuthi iLadysmith Black Mambazo izalelwe eMnambithi, bekuhlala kunesikhalo sokuthi kule ndawo kazikho izinhlelo ezisemthethweni ezigxile kwezobuciko. Sikhethe ukuthi
sibambisane nomphakathi nezikole kuleli sonto lekhethelo sibone ukuthi yikuphi esingacobelelana ngakho futhi sithuthukise ngakho ezobuciko kule ndawo,” kuchaza uMajozi.
Uthe ngoLwesithathu bazoba nombukiso wezindondo ehholo lasedolobheni, lapho umphakathi uzongena ngamaqoqo uyozibonela izindondo ezahlukene esezike zonqotshwa yileli qembu nezinye zezithombe zomhlaba ezikhona.
“Sifuna abantu baseMnambithi bazizwe beyingxenye yempumelelo yeMambazo, ngoba siyazi ukuthi bayaziqhenya ngayo futhi okunye wukuthi sikhumbule imisebenzi kabab’ uShabalala njengoba sazi ukuthi ubeke leli dolobha ebalazweni lomhlaba,” esho.
UMajozi uthi ngoLwesihlanu khona ehholo lomphakathi eMnambithi, kuzoba nesifundo esizokwethulwa nguDkt Sipho
Sithole, esivuleleke emphakathini nasemacikweni endawo.
Uveze ukuthi leli sonto lizophothulwa ngoMgqibelo ngomjaho ozoqala ekuseni, obizwa ngeJoseph Shabalala Marathon. Ucacise nokuthi kungani bekhethe leli sonto ukwenza le micimbi njengoba eveze ukuthi lihambisana nezinsuku ezandulela usuku uSolwazi Shabalala adlula ngalo emhlabeni njengoba wahamba ngomhla ka-11 kuyo le nyanga.
Uthe bazoba nolunye uhlelo oluhambisana nosuku lwakhe lokuzalwa olungomhla ka-28 kuNcwaba (August), olungeke lugxile eMnambithi njengoba kwaziwa ukuthi iMambazo ibisiyiqembu elidume umhlaba wonke, ngakho kumqoka ukuthi nakwezinye izindawo zibe khona izinhlelo zokumkhumbula nokuhlonipha iqhaza lakhe kwezobuciko kuleli.