ISILILO KUSHONA UMDLALI KANOBHUTSHUZWAYO
KUSHONE umdlali weStellenbosch FC, u-Oshwin Andries
(osesithombeni), obenekusasa eliqhakazile kunobhutshuzwayo wakuleli esehlakalweni okuthiwa ngokomthombo weTimes Live, esokugwazwa kwenye yezindawo zokucima ukoma, eKlapmuts, eCape Town.
Udlule emhlabeni ngoMgqibelo kwesinye sezibhedlela. Lo mdlali kuthiwa wagwazwa ngemuva komdlalo weDStv Premiership weStellenbosch FC neCape Town City bawunqoba ngo-3-2 ngeledlule.
Lo mdlali ubesaphethe irekhodi lakhe lokuba ngumdlali omncane kubadlali abagijima kwiDStv Premiership ukushaya igoli alishaya mhla begijima neRoyal AM ngo-3-1 ngonyaka odlule.
Izindaba zokudlula kwalo mdlali ziqinisekiswe yikhasi lale kilabhu ngoMgqibelo, ngemuva kokuba inqobe iChippa United ngo-2-1 ekuhambeni.
U-Andries ubesekhombisile ukuthi ungumdlali onekhono futhi uyakude kwazise uke wagijima kwi-U/20 engukaputeni kuleli qembu kwi-Cosafa Cup ne-Africa Cup of Nations (Afcon) nele-U/23.
Sekuwumlando ukuthi lo mdlali ubephiwe ekudlaleni unobhutshuzwayo kwazise ukhuliswe yiStellenbosch FC Academy, isikhungo sale kilabhu, futhi ubeyingxenye ohambweni lwaphesheya kwezilwandle lweDDC ngemuva kokudla ubhedu kwiDiski Challenge ngonyaka odlule.
USinesipho Mali oyiTechnical Analyst yeSafa emazingeni aphansi, utshele ILANGA ukuthi u-Andries ubengomunye wabadlali abanekusasa eliqhakazile kunobhutshuzwayo. Uthi ubenesiphiwo ngebhola futhi ekwazi ukudlala cishe zonke izindawo enkundleni.
“Ngikhumbule esinye isikhathi lapho besidlala omunye wemidlalo sidliwa, wasicela ukuthi ucela ukudlala indawo eseduze nabagadli okwenza wakwazi ukushaya amagoli amabili ngomzuzu ka-46 noka-57 nokwenza sakwazi ukudlulela phambili.
Ubenomzimba omuhle kakhulu, iNingizimu Afrika ilahlekelwe kakhulu. Uthi lo mdlali ubenobuchule bokudlala ibhola yingakho kungazange kumangalise naphesheya kwezilwandle ehambe neStellenbosch FC egila izimanga,” kusho uMali.
Leli phephandaba lizamile ukuthola uVela Khumalo ongumqeqeshi wamaJita (U/20) imizamo yalo kayizange iphumelele kwazise ucingo lwakhe belukhala lungabanjwa.
UTebogo Motlanthe oyisikhulu esiphezulu kwiSafa, uveze ukuthi umdlalo weBafana Bafana uzokuba ngomhla ka-24 womlenze wokuqala eFNB Stadium bese owomlenze wesibili ube mhla ka-27 we-Afcon, eMonrovia.