KUKHUTHAZWA ABAFUNDI NGOMNCINTISWANO WE-MATHS
KUKHUTHAZWA abazali ukuba baxhumane nothisha bezingane zabo abafundisa iMaths, ukuze zingenele imincintiswano yaminyaka yonke yalesi sifundo, ehlelwa yiSouth African Mathematics Foundation (SAMF).
Lesi sikhwama sisanda kumemezela ukuthi bonke abafisa ukungenela lo mncintiswano obizwa ngeSouth African Mathematics Challenge (SAMC) - kubafundi bakaGrade 4 kuya ku-7 ne-Old Mutual South African Mathematics Olympiad (SAMO) kwabakwaGrade 8 kuya ku-12 - sebengathumela imingenelo yabo.
Ukungenela kuyavalwa mhla ka-24 kwephezulu. Kunxuswa nothisha eNingizimu Afrika jikelele, ukuba bangazithambisi, bababhalise abafundi babo ukungenela lo mncintiswano.
“Njengoba amagama ale mincintiswano ezisho, izinhlelo zayo zikhuthaza abafundi ukuba bacabange basabalale. Abafundi kabavivinywa ngokohlelo lwemfundo yabo yonyaka esikoleni, kodwa baxukuzwa ugebhezi ngokucubungula isibalo nesibalo ngendlela ehlukile,” kusho isitatimende seSAMF.
UDkt Belinda Huntley, oyinhloko yomnyango wezeMaths, eSt Catherine’s Convent, eGoli futhi ongusihlalo we-Advisory Committee on Mathematics (ACM) yeSAMF, uthe: “Njengoba singothisha, sifuna ukuhlomisa abafundi bethu ngamakhono afanele ukuze bakwazi ukuthi uma bebona inkinga, bazibuze ukuthi ‘yiliphi ithuluzi okumele ngilisebenzise ukuyixazulula?’
"Akukhona-ke ukuthi lezi zibalo abavivinywa ngazo zilukhuni, kodwa wukuthi babuzwa zona ngendlela ehlukile. Abafundi abaningi kabazethembi ngokwanele, yingakho-ke beyisaba imincintiswano emayelana neMaths.
"Badinga ukujwayezwa yona kusukela besezikoleni zamabanga aphansi, ngoba uma besheshe baqala, izongena egazini. Ukubakhuthaza kwethu ukuba bangenele le mincintiswano, senzela ukubasiza ukuba bakwazi ukucabanga ngendlela evulekile, okuzobasiza kakhulu noma sebesezikhungweni zemfundo ephakeme. Yingakho-ke nje nginofuqufuqu lokuba izingane zijwayezwe imincintiswano yezibalo.”
Umfundi waseSouth African College Schools (SACS) eNewlands, eCape Town - odle umhlanganiso kwiSAMO ngonyaka odlule, u-Emmanuel Rassou, uthe iMaths iyisifundo esinezinselelo kubona bonke abantu.
“Engingacebisa ngakho abazimisele ngokubamba iqhaza emincintiswaneni yanonyaka, wukuthi kayikho into edlula ukubekezela. Yize eminye imibuzo yale mincintiswano ithanda ukuba nzima, kodwa uma usuqalile, ungaliphonsi ithawula. Sondela kothisha bakho uma kuwukuthi kunemibuzo ethanda ukuba nzinyana, ucele bakukhombise indlela.
"Ukuqonda iMaths kumayelana nokuqonda ukuthi kungathi uzama ukuthola impendulo yesibalo nesibalo,” kusho lo mfundi othi iMaths ibalulekile cishe kuyona yonke imikhakha. Amafomu okungenela le mincintiswano ayatholakala kwi-website yeSAMF.