KUPHAKANYISWE UHLELO LOKUBONGA IZIKOLE EZINGABACHITHI ABAPHINDA U-MATRIC
IPHAKAMISE uhlelo olusha lokubonga izikole ezingabachithi abafundi abasuke befuna ukuphinda umatikuletsheni uma bengaphumelelanga iMeya yaseNquthu, uMnu Zama Shabalala ngesikhathi umasipala wayo uhalalisela abaphase kahle leli banga yanyeke.
Lo masipala ubunomcimbi wokubonga abafundi ngoLwesihlanu.
UMnu Shabalala uthi nakuba ezinye izikole zikhinyabezeka ngenxa yokugcwala uma ziphindisa abafundi, bese zingakwazi ukukhiqiza u-100% wemiphumela kamatikuletsheni, kodwa kubalulekile ukuba abafundi banikwe elinye ithuba.
“Kufanele sizibonge izikole ezinika abafundi ithuba lokulungisa amaphutha asuke enzekile. Sonke siyazi ukuthi kunezingqinamba ekufundeni, okungenza ukuthi umntwana ubebhekane nezinkinga ekhaya, bese ephazamiseka ezivivinyweni zakhe.
“Zonke izikole ezibanikezayo abantwana ithuba lokuphinda umatikuletsheni, kufanele sizakhele uhlelo lwazo lokuzibonga,”
kusho uMnu Shabalala.
Uthi ngenxa yokukhathalela kwabo imfundo eNquthu, sebenqume ukungenelela ekwakheni izi-nkulisa nokuxhasa kwamanye amabanga ngezinsizakufunda nokufundisa.
Uthe bayazivakashela izikole zakule ndawo, bahlole ukusebenza kwazo ukuze lapho kunezinkinga khona bangenelele.
“Siyawuncoma umsebenzi omuhle esiwenzelwe ngothisha ngoba siyaziqhenya nje namhlanje ngale
ndawo, kungenxa yabo. Siwumkhandlu waseNquthu, siyawubona umsebenzi omuhle wokuthuthuka kwemfundo kule ndawo, yingakho sihlonipha iqhaza lothisha ngokuba-khuthaza ngemiklomelo.
“Phakathi nonyaka sihambela izikole ezahlukene, sifake isandla ngemifaniswano yesikole kwabaswele, sakhe okufanele sikwakhe njengamagumbi athile ukuze imfundo iqale kahle kuzona zonke izigaba zayo.
“Ukuvakashela kwethu izikole kuyindlela yokweseka abantwana bethu nokukhathalela yonke imindeni yaseNquthu ukuze ngelinye ilanga isimame ngenxa yalezi zingane,” kusho uMnu Shabalala.
Abafundi abawu-10 babongwe ngama-laptop nezindondo, kwabongwa nezikole ezisebenze ngokuzikhandla.
Phakathi kwabafundi ababongiwe, kukhona noLwandisa Sibiya waseKlwana Combined School omele le ndawo esifundeni uMzinyathi. ULwandisa uthe ufisa nabanye abafundi basike iphethini ekusebenzeni kwakhe kanzima nyakenye, ukuze bezoklonyeliswa kubuka izwe lonke.
“Bekunzima, kodwa namhlanje sekuphenduke injabulo. Ngisho abazali bethu bajabulile. Nabanye abafundi bangakwenza kwenzeke,” kusho yena.