IMEYA YASEMSINGA ITHI IBINGASIHALELI ISIKHUNDLA EBUYISELWE KUSONA
UBENGENAYO intshisekelo yokubuyela kwesokuba yimeya yaseMsinga uMnu Felinkosi Sikhakhane, olandwe engusomlomo kuMasipala wesiFunda uMzinyathi ukuba ayovala isikhala esivuleke ngokukhonjwa indlela kukaMnu Mletheni Ndlovu, ongaphandle ngebheyili ka-R10 000, ngecala lokunika onogada bakhe izibhamu zenkampani yakhe.
UMnu Sikhakhane oke wawuhola lo masipala phambilini, uqale ukusebenza emasontweni amabili adlule. Uthe ukholwa wukuthi abaholi bakhe babone isikhala sivela eMsinga, bathi makabuyele khona.
Utshele ILANGA ukuthi akazange akwamukele kahle ukubuyiselwa kwakhe eMsinga.
“Inkinga wukuthi okubi kuyakugqiba okuhle ngomzuzwana nje. UMsinga bewuza kahle futhi namanje uza kahle njengoba senza nemicimbi yokunikezela ngemifundaze kubafundi bakamatikuletsheni abaphase kahle.
"Akusho ukuthi ngalokhu nje okuvelayo ezweni ngesigameko saseMsinga (ukubulawa kwekhansela, emuva kwalokho elinye elalihamba nalo lasukuma emngcwabeni lagagula owayeyimeya, lathi nguyena umsocongi), sekusho ukuthi sekonakele konke-ke, akusekho okuhle okwenzekayo.
"Kukhona okuhle kwabe sekugqitshwa wokubi. Angikuthandanga ukubuyela eMsinga ngoba phela le ngoma okuthiwa mangiyigide, sengake ngayigida, kodwa uma uthunywa ngabaphathi bakho, kawukwazi ukunqaba.
"Ngibuyile impela futhi kusazosetshenzwa kakhulu la eMsinga,” kusho uMnu Sikhakhane.
Uthe njengoba ebuyile kulo masipala, ufuna ukugcizelela kakhulu emphakathini ukuthi makubuyelwe emasimini, kuyolinywa.
Uveze ukuthi bazowulimela umphakathi, bawunikeze izimbewu, wona-ke, uzozihlakulela.
Uthe lokho kuzosiza kakhulu ekuxosheni indlala eMsinga. Odabeni lwesomiso esihlasele eMsinga, uthe usazohlala nemeya yaseMzinyathi, uMfu Petros Ngubane, babhekisane lona.
“Sizoluhlela udaba lwamanzi, sengikhulume nomhlonishwa uNgubane, sengigqoke isigqoko esisha sokuphatha uMsinga,” kusho uMnu Sikhakhane ohole uMasipala waseMsinga iminyaka ewu-10, emuva kwalokho wathunyelwa eMzinyathi kwesokuba ngusomlomo.