Bathwele kanzima omasipala ukuhlinzeka umphakathi ngamanzi
Lmeya ithi ugqamcishi kagesi uphazamisa izinjini eziphampa amanzi zingakwazi ukusebenza
UKHALA ngokugqemeka komasipala izingozi ezimbili ngesikhathi esisodwa uSihlalo weSouth African Local Government Association (Salga), uMnu Thami Ntuli, othi inkambabeyibuza kagqamcishi (load shedding) seyiphenduke isinengiso kwazise iholela ekuphazamisekeni kokusatshalaliswa kwamanzi emiphakathini.
Lokhu ukusho ngoLwesihlanu ethwele isigqoko sakhe sokuba yimeya yaseKing Cetshwayo ngesikhathi ethula umsebenzi wokufakwa kwamanzi eMatheku, eShowe, ngaphansi kukaMasipala waseMlalazi.
Lo msebenzi ozodla u-R49 million, kulindeleke ukuba usonkontileka awuqale zingakapheli izinsuku eziwu-14. Umphakathi uzohlomula ngamathuba awu-20 emisebenzi.
“Iphupho lami wukuthi bonke abantu baseKing Cetshwayo babe namanzi,” kusho uMnu Ntuli.
Uthe izinjini eziphampa amanzi kazisakwazi ukuwaphusha ngendlela efanele ngoba kunamahora lapho ugesi osuke ungekho khona, namanzi engangeni ngendlela efanele emathangini.
Lokhu uthi kwenza amanzi angafinyeleli ngendlela emathangini aphakela umphakathi, nenetwork ingabikhona komakhalekhukhwini, okwenza impilo ibe nzima kakhulu emakhaya.
Uthe le nkinga isihlasele nasemadolobheni amakhulu afana neTheku.
Uveze ukuthi njengoba ebeseMatheku nje, zikhona izindawo angakayi kuzona. Uthe njengamanje bamatasa baxoxa ne-Eskom, ukuba ingawucishi ugesi lapho kukhona khona izinjini zamanzi ukuze kungeke kube nokuphazamiseka
kokusatshalaliswa kwamanzi emphakathini.
“Umthethosisekelo kawukuvumi ukuthi kube nokuphazamiseka kwamanzi emphakathini.
"Le nhlekelele yokuhamba kukagesi seyenza eminye imikhandlu icabange nokuthenga izinjini, okuyizona ezizosebenza ukulekelela ekuphakweni kwamanzi.
"Ukuthengwa kwezinjini kuzokhuphula izindleko ngoba kuzodingeka kuhlale kuno-diesel nabaqaphi abazogada lezi zinjini ubusuku nemini,” kusho uMnu Ntuli.