Ingcindezi kuRamaphosa ngenkulumo ebhekiswe esizweni
INKULU ingcindezi kuMengameli Cyril Ramaphosa, ozokwethula inkulumo ebhekiswe esizweni ngoLwesine (State of the Nation Address), ukuba amemezele izinyathelo ezinqala uhulumeni wakhe ozozithatha ukutakula izwe obhukwini eselicwile kulona iminyaka – lungabonakali ushintsho – naphezu kwezethembiso zeqembu lakhe, i-ANC.
Inkinga eseqhulwini wukuba anekele izwe ukuthi uhulumeni uzokwenzani eyehlukile kulokhu ukulungisa ingwandla kagqamcishi (load shedding), esibe khona iminyaka ewu-16 njengoba yaqala kusaphethe uMnu Thabo Mbeki ngo-2007.
Njengoba sesike saphawula kule ngosi phambilini, kasikholwa wukuthi lo hulumeni ungakwazi ukuxazulula le nkinga ngenxa yokungabikhona kwamakhono nesipiliyoni sokuyixazulula emazingeni ombuso.
Kodwa-ke isiZulu sithi kakulahlwa mbeleko ngakufelwa; mhlawumbe ngelinye ilanga kukhona umlingo oyoqhamuka nawo uhulumeni, usimangalise sonke.
Ukuxazululwa kwenkinga kagqamcishi kungasiza ukwelapha esinye isifo leli zwe eselizame iminyaka eminingi ukusiqeda, kungalungi.
Leso yisifo sokuntenga komnotho nokusweleka kwamathuba emisebenzi, ikakhulukazi entsheni.
Esinye sezizathu zale nkinga, wuhlobo lwemfundo engekho eqophelweni eliphezulu, etholakala ezikoleni.
Kuthi noma intsha yethu ineziqu zasemanyuvesi, kodwa ingawutholi umsebenzi ngenxa yokuthi ishalazela izifundo zesayensi, izibalo nezobuchwepheshe, okuyizona ezihlomisa umuntu ukuba aqasheke kalula noma akwazi ukuzimela, azisebenze.
Ukuphuma nje kancane endleleni; kufanele kesizibuze ukuthi kwenziwa yini ukuba i-United States of America (USA), ukwenza nje isibonelo, ikwazi ukuqasha cishe bonke abantu abafuna umsebenzi kuleliya lizwe.
NgoLwesihlanu nje, uMnyango weziSebenzi e-USA, umemezele ukuthi ezinyangeni ezimbalwa ezedlule kuqashwe abantu abangaphezu kuka-500000, okwenza babe ngamaphesenti amathathu kuphela abantu abaswele umsebenzi kuleliya lizwe.
Isimo esihle somnotho wase-USA ngesinye sezizathu izigidi zabantu emhlabeni jikelele, zihlale zifuna ukuyohlala khona, ezinye zize zeqe imingcele ngokungemthetho.
Uma sesibuyela ekhaya, okungamsiza uRamaphosa ukubhekana nezinselelo zomsebenzi wakhe, wukuqinisekisa ukuthi ikhabhinethi longqongqoshe okulindelwe aliqoke maduze, linabantu abaqotho, abanamakhono, imfundo esezingeni elifanele nabazimiselayo ngomsebenzi.
Ngeke kwamsiza yena noquqaba olusosizini, ukufukamela abanye bongqongqoshe asebekhombisile ukuthi bayizehluleki.
Abanye babo ngosikhwili-phambana-nobhoko njengoba benganqeni ukumnyundela, benze lokho okuphambeke nezinhlelo ezimenyezelwe wuhulumeni. Sethemba ukuthi umengameli uzozibamba ziqine, athathe izinyathelo ezifanele ukuhlenga izwe.