AMASELULA NOMA AMA-TABLET ANGAWULIMAZA UMQONDO WABANTWANA
NJENGOBA kuvulwe izikole ngenyanga edlule, indodana yami eneminyaka ewu-5 ubudala, ibiqala uGrade R.
Nami-ke njengomzali osefundile ngezimo ezingaholela ekutheni umntwana agcine engasabambi kahle esikoleni, ngike ngahlala phansi nobaba wasekhaya, sadingida udaba lokuthi indodana ingabe isawusebenzisa umakhalekhukhwini wayo wokuchitha isizungu phakathi nezinsuku.
Sivumelane ngokuthi kuhle iwuthole ngoMgqibelo kuphela, futhi ikalelwe isikhathi ukuze iphumuze umqondo. Sithe uma sesivumelene, sase simbiza unkunzana. Besazi ukuthi lolu daba ngeke lube lula neze ngenxa yokuthi ubesejwayele kakhulu ukuluswa yilo makhalekhukhwini aze azumeke.
Simbizele ekameleni samhlalisa phansi, samchazela. Siqale ngokumbuza ukuthi angithi uyazi ukuthi useyofunda uGrade R, wathi yebo, sase simchazela ukuthi uGrade R umlungiselela ukuya kwaGrade 1, lapho umsebenzi wesikole ozoba mningi khona nomsebenzi wesikole owenziwa ekhaya, wase evuma.
Simchazele ngale nqubo entsha yokusetshenziswa kukamakhalekhukhwini. Noma ngubani onomntwana omncane, uzokwazi ukuthi le genge ibathanda kangakanani omakhalekhukhwini, ama-game nezinqolobane zolwazi ezifana noGoogle noYouTube ezitholakala kuwona.
Okusimangalisile wukuthi uvume kalula, kwangaba ngale ndlela ebesiyicabanga. Kungenzeka ukuthi yingoba besesike saluhlokoloza lolu daba ngamaholide. Uma ngibuka, okunye okusisizile kube wukumchazela kunokuthi sivele simphuce noma siwufihle.
Kuyasiza ukubafaka abantwana ezinqumweni ezibathintayo, kwenza baziqonde izizathu zesenzo sakho futhi bazizwe bekhathalelwe, futhi bethandwa.
Kuyiqiniso esingelibalekele ukuthi ubuchwepheshe buwuthuthukise kakhulu umphakathi, futhi benze kwabalula ukuxhumana kwabantu, wukutholakala kolwazi nokugcinwa kwalo, kodwa ngeke sikubalekele ukuthi miningi imithelela engemihle yokuchitha isikhathi esiningi komntwana komakhalekhukhwini nomabonakude engagadiwe. Lapha singabala:
Ukungaziphathi ngendlela efanele komntwana: Abantwana abasemabangeni aphansi ezemfundo uma bebuka umabonakude noma besebenzisa omakhalekhukhwini amahora angaphezu kwamabili ngosuku, bangazithola behluleka wukugxilisa umqondo emsebenzini wesikole noma enkulumweni ende futhi kungaphazamisa ubudlelwano babo nontanga yabo.
Ngasohlangothini lwezemfundo: Ongoti baveza ukuthi abantwana abanomabonakude emakameleni abo, kabenzi kahle esikoleni nasezivivinyweni zabo.
Ukukhuluphala kuze kweqe: Ukuchitha isikhathi eside kumabonakude, umntwana engawunyakazisi umzimba, kungaholela ekutheni agcine esekhuluphala ngendlela enobungozi.
Inkinga yokulala: Baningi abantu abadala abasebenzisa umabonakude ukuze bazumeke, kodwa kubantwana, ukugqolozela i-screen aze uzumeke, kushiya izithombe zisadlala emqondweni, okungamenza agcine esenenkinga yokulala. Lokho kungamphazamisa esikoleni ngenxa yokukhathala komqondo nomzimba.
Udlame: Ukubuka izinhlelo ezinesihluku, kungaholela ekutheni izingane zigcine sezithatha izenzo ezinodlame nesihluku njengento ejwayelekile, besezizenza kontanga yazo esikoleni nasemakhaya.
Izithombe zocansi… Ngenxa yokungalawulwa kahle kwe-internet, kulula kakhulu ukuthi umntwana athi ezibhekela izinto eziqondene nama-game noma umsebenzi wesikole, avele aqondane namafilimu noma izithombe zocansi. Lokhu kungawuphazamisa kakhulu umqondo wakhe uma kwenzeka esemncane, engakakulungeli ngokomqondo.
Kubalulekile ukuthi uthole ama-app akwaziyo ukuzivimba lezi zithombe, enza ukwazi nokuxhuma umakhalekhukhwini wakho nowomntwana ukuze ukwazi ukubona ukuthi ungena kumaphi ama-website, futhi ubukani kuwo.
NGIWUSHAYA KANJANI UMTHETHO NGAPHANDLE KOKUMPHATHA KABI UMNTANAMI?
Kufanele njengomzali ungakusabi ukushaya umthetho futhi uchazele umntwana ngesizathu somthetho wakho.
Okunye okungasiza wukuthi abazali nabadala bazijwayeze ukuhlala baxoxe nezingane njengomndeni, ngaphandle kokuhlala ezingcingweni bekhuluma nabantu abangekho endlini. Ngaleyo ndlela, abantwana bazokubona ukubaluleka kokungasetshenziswa kobuchwepheshe kuze kweqe. Kubalulekile ukuba abazali babuqonde ubungozi bokusetshenziswa kwamaselula nomabonakude kuze kweqe ukuze abantwana bangangeni kulolu gibe.
Ngo-2015, kunenkampani yezobuchwepheshe eyakhipha imiphumela yocwaningo ekhombisa ukuthi umntwana oyedwa kwabathathu uzizwa engakhathalelwe futhi engathandwa uma abazali bematasa komakhalekhukhwini uma behleli naye noma ngenkathi kudliwa ekhaya.
Ucwaningo luveza nokuthi uma abantwana bezitshwa ngale ndlela uma bekhuluma nathi – ngisho ngabe kuwukuphendula umyalezo nje kumakhalekhukhwini – bavele babone ukuthi kushuthi yiwo obalulekile kunabo.
NAZI IZINDLELA ZOKUNCIPHISA ISIKHATHI SIKAMABONAKUDE NOMAKHALEKHUKHWINI:
• Shaya umthetho njengomzali mayelana nokusetshenziswa kukamabonakude namaselula;
• Makube nesikhathi esinqunyiwe abangeke badlule kusona uma besebenzisa omakhalekhukhwini;
• Mabangasetshenziswa omakhalekhukhwini etafuleni uma kudliwa;
•Makube nomdlalo womndeni lapho omakhalekhukhwini bengeke bavunyelwe;
• Uma kuhanjwa ngemoto, makuxoxwe, kungahlalwa komakhalekhukhwini;
• Emakameleni makungabi nomabonakude noma mawucishwe ngesikhathi sokulala.
Uma kungenzeka, kufanele umndeni ube nosuku olulodwa esontweni lapho ozoke ubeke eceleni omakhalekhukhwini - ngaphandle kokubamba izingcingo bonke abantu bangangeni ezinkundleni zokuxhumana ukuze baphile esikhathini nasendaweni lapho bekhona, nomqondo uke uthole ukuphumula.
Ukhumbule mzali, konke lokhu ukwenza ngoba ukhathalele ukukhula kahle komntwana nokugwema izinkinga. Noma ngabe akawuzwisisi kahle umthetho okokuqala, kodwa uzogcina esewujwayele. Ungakhohlwa, IsiZulu sithi, “Ugotshwa usemanzi.”
• UZonke Shazi-Hlongwane ugogode ezifundweni zeChild and Youth Care, okuwukukhuliswa nokunakekelwa kwabantwana ne-ntsha. Unenhlangano “Ikusasa Ngelami”, elekelela intsha ezingqinambeni zempilo. Ungumqeqeshi nomeluleki wabantwana nabazali.
• Le ngosi izoshicilelwa kabili ngenyanga.