OWE-STORMERS UBUYISE IZINDUKU KUBAQASHI BE-SHARKS ABAMCHITHA
UBUYISE izinduku kubaqashi bakhe abadala abamchitha uMannie Libbok, ongumdlali weStormers, eshaya into ecokeme bebhekene neqembu lakhe lakudala.
IStormers yaseWestern Cape ibhabhadise iCell C Sharks ngo-46-19 koweVodacom United Rugby Championship ngoMgqibelo eHollywoodbets Kings Park, eThekwini.
ISharks ize kulo mdlalo ihambela phezulu emuva kokuba isule izinyembezi amaqembu akuleli ashaya udaka ngeledlule, ehlulwa wonke emidlalweni yawo ekuhambeni.
ISharks kwaba yiyona eyanqoba umdlalo ekuhambeni yehlula i-Edinburgh eScotland.
ULibbok, oqokwe njengomdlali wosuku ngoMgqibelo, bekuthi akalidle alifele leli qembu eliqeqeshwa nguNiel Powell osabambe lesi sigqiki njengoba kulindelwe ukuba leli qembu limemezele ngokusemthethweni umqeqeshi walo omusha.
Lo mdlali olokhu ekhombisa ukudlondlobala njalo kulo mdlalo, okufakazelwe wukuthi abizelwe eqenjini lesizwe AmaBhokobhoko, ukhombisile ukuthi leli qembu lenza iphutha ngokumkhulula.
Nakuba iningi labadlali abawumgogodla weSharks belingekho kulo mdlalo kodwa bekungalindelwe ukuba iStormers izenzele umathanda kwazise kuhlala kusiphuka izidindi uma la maqembu ebhekene.
Ngokunqoba lo mdlalo kwezivakashi, kuzenze zenyukela endaweni yesibili kwi-log njengoba zilandela iLeinster yase-Ireland engayazi induku kule sizini njengoba isayinqobe yonke imidlalo ewu-13 esayidlalile.
ISharks ilele kunombolo-8 emuva kwemidlalo ewu-12.
Emdlalweni olandelayo oShaka bazobhekana neLions eGoli ngesonto elizayo.
* Kuzo ezebhola lombhoxo:
IScotland iyiqale ngegiya eliphezulu imidlalo yeSix Nations ebhekwe ngamehlo abomvu njengoba igijinywa ngamaqembu ahamba phambili e-Europe.
IScotland ifake usawoti esilondeni se-England iyehlula ngo-29-23 eTwickenham, khona eNgilandi.
I-England ithathwa njengelinye lamaqembu ahamba phambili kulo mdlalo emhlabeni kanti isanda kwehlukana nomqeqeshi obesehlale iminyaka eminingi u-Eddie Jones.
* Komunye umdlalo: I-Ireland ibhaxabule iWales ngo-34-10.