BASHAYWE NGESITHENDE ONONDWEBA ABANUKWA NGENKOHLAKALO KWEYESAFA
SIYAKHALA isitswebhu emacaleni abhekene namakilabhu agijima kwiSafa KZN ABC Motsepe League asolwa ngokungaziphathi kahle emidlalweni yakulesi sigaba esiphakela eseMotsepe Foundation Championship.
ILANGA lihoshe ukuthi emacaleni angene ngoLwesihlanu, iMilford FC ilinqobile elayo lokuduba umdlalo kweMuzi King Masters, yaphinda yagixatshezwa ngamaphuzu agcwele alo mdlalo.
UKwenzakwakhe Ngwenya weSafa utshele leli phephandaba ukuthi amacala ahlalile eThekwini kodwa kwaba yileli leMilford FC kuphela okuphume isigwebo kulona.
Uthe iDurban Pioneers, esolwa ngokuhubha unondweba ngesikhathi igijima neGWP Friends, icele ukunikwa isikhathi ukuze ikwazi ukuzozivikela kuleli cala.
Leli cala lizongena kusasa ngoLwesibili emahhovisi eSafa, khona eThekwini.
Amanye amacala osekulindwe izinqumo zawo ngele-X1
Experience neNewcastle All Stars.
Kuleli cala kuthiwa i-Experience yehluleka ukufika enkundleni kumele idlale ne-All Stars.
Elinye icala ngele-Asande FC okuvela ukuthi yatitinya unondweba ngenkathi ibhekene noMkhumbane Classic.
UNgwenya uthe ugculisekile ngokushesha ukulalelwa kwalawa macala.
Uthe okuhle wukuthi kuleli sonto eledlule onondweba abanukwa ngokukhohlakala bakhishiwe, yingakho kube nomehluko omkhulu, zangaba khona izingqinamba emidlalweni.
* IStonebreakers FC ishaye i-Asande FC ngo-2-1 wamagoli kaThabiso Mgwaba no-Ayanda Dlamini kwathi uMkhumbane Classic washaya iMuzi King Masters ngo-1-0 wegoli likaThobani Mncwango ngoMgqibelo eMandeni.
* IThekwini Coastal izokwamukela uMkhambathi FC koweligi ngoLwesithathu ngo-15h00 eSJ Smith Stadium, eWema.