URULANI UVUMA EYOKUNCISHWA UMOYA YI-PIRATES E-SOWETO
UVUMA eyokuthwaliswa kanzima yizimbangi zabo ezinkulu uRulani Mokwena ongumqeqeshi weMamelodi Sundowns elokhu iqhubeke njalo nokugila izimanga.
IDowns iguqise ngo-1-0 i-Orlando Pirates koweDStv Premiership ngoMgqibelo ntambama e-Orlando Stadium, eSoweto.
Igoli kulo mdlalo libhajiswe enethini nguCassius Mailula, ongalibheki ipali kulezi zinsuku.
Lena bekuyiwini ka-15 yeSundowns kulandelana kwiligi.
UMokwena oseyibambe ngesandla esisodwa inkomishi yeDStv Premiership, uvuma eyokudonsa kanzima kwezakhe.
Phela iDowns ivamise ukuthi kube yiyona efundisa izimbangi ibhola.
Kodwa kulo mdlalo kwenzeke okungajwayelekile.
“Kanginakho okutheni ngaphandle kwenhlonipho nothando ngaleli qoqo (isikwati).
“Uma kungathiwa mangibanike isilinganiso kusuka phansi kuya ku-10, ngingabanika u-15.
“Ngiyaziqhenya ngaleli qoqo, ngiyaziqhenya ngethimba labaqeqeshi.
“Kodwa ngeke ngikufihle ukuthi sithwale kanzima, iPirates isishikilisile.
“Ngimangele ukuthi kanti nathi siyakwazi ukumaka ngokweqophelo eliphezulu emuva ngoba ngokujwayelekile yithina esiphatha ibhola.
“Kodwa kulo mdlalo yithina ebesimaka sihleli emuva,” kusho uMokwena.
Uthi nakuba ezikaMagebhula zibacindezele, bekubafanele ukuwunqoba.
“Nakuba bebesijijimeza kodwa sithole amathuba amaningi futhi amakhulu.
“Okungivule amehlo ngalo mdlalo wukuthi kanti nathi siyakwazi ukubhekana nemidlalo elukhuni, siphendule kahle esimeni ebesibhekene naso.
“Bekubhekene amakilabhu amabili kodwa iPirates ibiwuthwele umdlalo, lokho ngeke ngikubalekele.
“Umehluko kube wukuthi thina besithola amathuba angcono kunabo.
“Ngiyaziqhenya ngabadlali bami,” kusho uMokwena.