Abalandeli bangathola ubulungu ngokungena kwi-app yamaZulu FC
ABALANDELI bethu sebezobhalisela ubulungu ngendlela yobuchwepheshe besimanje njengoba sisezinhlelweni zokwethula i-app yamaZulu FC.
Sikhuza isiqubulo ezithi ‘Hebenation ngabe igazi lakho liluhlaza na? Isikhathi sokulinda siphelile’.
Okumele ukwenze wukufaka le app efonini yakho, okuzokwenza uzizuzele okuningi okukhethekile kusuka ezaphulelweni zokukhithiza igilosa kwaSpar, kuya kumasingcwabisane nezindaba ezizohlinzekelwa kuphela abalandeli bethu bokuqina.
Ubulungu boSuthu buhlukaniseke izigaba ezintathu; okungobujwayelekile obumahhala, iGold nePremium.
Ngale ndlela uzokube sewunobulungu obusemthethweni njengomlandeli wekilabhu, kodwa-ke uma uthanda ukuba nanekhadi, ungathunyelelwa lona ngezindleko ezithe xaxa.
Kumele ungahlukani nezinkundla zethu zokuxhumana ukuthola ezintsha njalo nokuthi uyifaka kanjani le-app efonini yakho.
Isiyatholakala kwi-App Store kwabasebenzisa i-iPhone, kwiGoogle Play Store kwabeAndroid nakwi-App Gallery kwabeHuawei.
SINETHEMBA LOKUJIKA ISIQALO ESINGESIHLE KWEYELIGI NONYAKA
Indlela esiqale ngayo imidlalo yalo mzuliswano kayehli kahle kwabaningi okubalwa kubona nabalandeli asebeqalile ukuzwakalisa ukukhathazeka kwabo njengoba abanye besola abadlali, abanye bagxeka abaqeqeshi, kanti abanye umunwe bawukhomba kithina esingabaphathi.
Sisaqoqe amaphuzu ayisithupha kuphela emidlalweni emihlanu ebiqukethe amaphuzu awu-15.
Sinethemba lokuthi abadlali bazokwazi ukujika izinto maduzane.
Nokho yasiphatha kabi indlela esangenelwa ngayo yigoli sibhekene neRichards Bay FC ngeledlule eMlazi.
Emuva kwawo, saba nethemba lokuthi abadlali bazojika izinto koweMaritzburg United eMgungundlovu.
Amaphutha esawenza ngezikhathi ezibucayi aholela ekutheni sigcine sesilandela ngemuva kulo mdlalo, esithole igoli lokulinganisa kuwona sekuvalwe amehlo.
Ngiyabancoma abadlali ngokulwa kulo mdlalo.
Abaqeqeshi banethemba lokuthi konke sekuzohamba kahle.
WOZANI EMLAZI! SIZIMISELE NGOKUHAMBA IBANGA ELIDE KWI-NEDBANK CUP
Leli sonto eliqalayo lisinika ithuba lomshikashika omusha wokulwela isicoco seNedbank Cup njengoba sizovula ngomdlalo neTornado FC ngeSonto eMlazi.
Ngilindele umdlalo onzima kule kilabhu edlala kwi-ABC Motsepe League njengoba la makilabhu (ama-amesha) ejwayele ukulwela ukuzibonakalisa kulo mqhudelwano.
Ngeke silokothe sizithathe kancane izitha zethu.
Phela nanamuhla abalandeli basenokuphoxeka ngendlela esahluleka ngayo kowamanqamu walo mqhudelwano ngo-2010 sihlulwa yiBidvest Wits eyayinabalandeli abangatheni.
Phela uSuthu lwaluthwelwe ngeqoma emuva kokuwashisa ijezi iMamelodi Sundowns kwi-semi-final.
Ikilabhu edliwe kowamanqamu kayikhunjulwa njengoba kuhlale kukhulunywa ngezingqwele, okuyinto esiyifunde nakwiMTN8 kule sizini.
Ukunqoba iNedbank
Cup kuyisango lokuyomela elakuleli kwiCaf Confed Cup.
Okwethu nje wukubhekana ngokuzinikela umdlalo nomdlalo walo mqhudelwano.
IJABHISILE INKULUMO YOMQEQESHI WAKUDALA WOSUTHU
Ngidumalile ngezinkulumo zikaBrandon Truter obengumqeqeshi wethu lapho ebekhala ngokuthi kwakugxanjukelwa emsebenzini wakhe futhi kunabadlali ababengeneme ngokuthi beqiwa yijezi.
Lezi zinkulumo zivela manje nje, phambilini wayephumele obala encoma indlela ehlelekile asebenza ngayo nabadlali nabaphathi bekilabhu ngesikhathi esayingxenye yayo.
Sinabadlali abazihloniphayo, abangasoze benza lezi zinto akhuluma ngazo, futhi sonke ekilabhini siyazihlonipha.
UTruter ungumqeqeshi omuhle futhi kangifisi ukuthi kube nobutha phakathi kwethu nabaqeqeshi abake bayibamba ekilabhini.
Kasifisi-ke ukuthi sizithole sinephuzana emphakathini nabaqeqeshi bethu bakudala njengoba kwenzekile phakathi kukaTruter nabaqashi bakhe bakuqala iSwallows FC.
SITHI DUDU EMNDENINI WOMDLALI WESTELLENBOSCH FC ODLULE EMHLABENI
Ngifisa ukudlulisa amazwi enduduzo kwiStellenbosch FC nasemndenini ka-Oshwin Andries (19) emuva kokudlula emhlabeni kwalesi sitobha ebesinekusasa eliqhakazile.
Kakugqemekanga nje ikilabhu yakhe kuphela, kodwa kulimele neWestern Cape kanjalo nelakuleli njengoba ubengukaputeni ka-U/20.
Lo mdlali owakhiqizwa yisikhungo seStellies, ungomncane kunabo bonke ukushayela le kilabhu igoli kwiDStv Premiership, okuyinto eyakhuthaza abaningi.
Sengathi umphefumulo wakhe ungalala ngoxolo.
Sengathi bonke abebesondelene naye bangalala ngenxeba.
* USandile Zungu UnguMengameli wamaZulu FC