BAZOCOTSHELELWA NGOLWAZI EMCIMBINI WOTHANDO
KUZODINGIDWA nezihloko eziphazamisa uthando emcimbini wokugubha usuku lwezithandani obizwa ngokuthi Lovers First Dance, ozoba seGolden Horse Casino, eMgungundlovu, mhla ka-18 kwephezulu. Lo mcimbi uzobe uyingxenye yokugubha inyanga yezithandani, uNhlolanja (February) njengoba umhla ka-14 kuwusuku lwezithandani. Ngokusho kukaMnu Bonginkosi Zulu ongumqondisi wenhlangano engenzi inzuzo, iGlobal Community Project and Entertainment Events, lo mcimbi uzoxuba izinto ezahlukene okubalwa kuzo ongoti abazoxwayisa ngezihloko ezahlukene, abaculi, oDJ, osomahlaya nosonkondlo. “Siyazi ukuthi esikhathini samanje abantu abasothandweni babhekana nezinkinga ezahlukene, ngakho sihlanganise lo mcimbi wokuthi bangagcini ngokujabula nje kuwona, kodwa baphinde bacobeleleke ngolwazi oluzobathuthukisa,” kusho uZulu. Uthe phakathi kongoti abazocobelela abantu ngolwazi, kukhona abezemali, osonhlalakahle nabezomthetho. “Sinxusa abantu babe yingxenye yalo mcimbi ngoba wehlukile, akukhona ukujabula nje, kodwa bazothola nolwazi olungabasiza empilweni njengoba sifuna bago-duke bevulekile emqondweni ngezindlela ezahlukene,” esho. Uthe ngawo lo mcimbi, bafuna ukukhuthaza uthando nobumbano kubantu. “Kasimemi nje abasothadweni, kodwa abantu bangakwazi ukufika nabazali babo, abangani, ogogo nomkhulu njengoba sizobe sinakho okuzojabulisa abancane nabadala,” kusho uZulu. Uveze ukuthi uhlu lwabazoshiyelana inkundla luyakhombisa ukuthi kalukhethi phela emasini, kodwa lwamukela bonke aba-ntu. Phakathi kwalabo abazobonakala esiteji kubalwa iMalini, uVumar, uSkyewanda, u-Afrosoul, uHappygal, uZodumo, uFlymotion, uTha Simelane, uDust noMagcwabe Imbongi. UMnu Zulu uthe iGlobal Community Project and Entertainment Events isungulwe ngonyaka odlule, kodwa isiphumelele ukusiza izingane ezahlukene ngomfaniswano wesikole. Khona manjalo, kuhlelwe omunye umcimbi wothando, iDurban All White ezoba se-Inkosi Albert Luthuli International Convention Centre, eThekwini ngosuku olufanayo. Kuwona kuboshelwe uMondli Ngcobo, u-Ami Faku, uSjava, uBoohle, uZandie Khumalo, uMsizi Shembe, uNtencane, uNaima Kay nabanye. Siyazi ukuthi esikhathini samanje abantu abasothandweni babhekana nezinkinga ezahlukene... UDJ Happygal UZANDIE