Kuzogqama amahubo kuShaka Ilembe
Umhubi wawo, uMbuso Khoza uthi lo mdlalo uzoba yisifundo
AMAHUBO azoba yingxenye enkulu yokucacisa ngomlando nangezigameko ezenzeka ngesikhathi sokubusa kweSilo uShaka kaSenzangakhona - iLembe - emdlalweni obhekwe ngabomvu, "uShaka Ilembe", ozoqala ukukhonjiswa ngeSonto kuMzansi Magic.
Lokhu kuvezwe nguMbuso Khoza - owaziwa ngokuhuba nangezingoma zasemandulo - ngesikhathi kwethulwa lo mdlalo eMonte Casino, eGoli ngoLwesibili.
Lo mcimbi ubuhanjelwe ngosaziwayo abahlukene okubalwa nabalingisi balo mdlalo nabanye abebezokweseka ukuqala kwawo.
Maningi amafilimu nemidlalo kamabonakude esike yakhiqizwa ngeLembe, ngokusho kukaNomsa Philiso oyisikhulu kwaMultichoice Group, okuyinkampani eyengamele uMzansi Magic, kodwa kuyaqala ukuthi kube nokhiqizwe yinkampani yaseNingizimu Afrika.
Uthe lo mdlalo wenziwe ngezandla zabantu bakuleli kusukela ocwaningweni olubathathe iminyaka ewu-6 kuya ekudidiyeleni.
Wenziwe yiBomb Productions eyaziwayo ngemidlalo yakuleli kumabonakude.
UNomsa uthe bayaziqhenya ngethimba abasebenzisane nalo, lenze konke okusemandleni ukuqinisekisa ukuthi lo mdlalo uthatha abantu ubabeke ngesikhathi sasendulo sokuphila kweLembe, kusukela ekuzalweni kwalo, ukukhula nokubusa kwalo.
Uveze ukuthi ukuze bawenze bekumele bathole konke okuthinta umlando njengoba unezindlela ezahlukene ohunyushwa ngazo - ngakho bekumele bahlanganise, bathole lokhu okusondelene kakhulu neqiniso.
U-Angus Gibson ongumqondisi nomunye wabadiyeli balo madlalo, uthe nakuba belwenzile ucwaningo ngeLembe, kodwa abantu kumele bakuqonde futhi ukuthi kusewumdlalo kamabonakude, akulona iqophamlando.
Uthe okuhle ngalo mdlalo uqala ekuqaleni kwezinto zonke ezithinta iLembe njengoba ukhuluma ngokuhlangana kweNkosanazana yaseLangeni uNandi neNkosi uSenzangakhona, bese ukhuphuka uthatha umbukeli umbeke.
Uncome abalingisi balo mdlalo, wathi bazinikele ngokweqile ngesikhathi beqopha njengoba bekunezikhathi lapho bekuphoqa ukuthi bangalali, bachithe ubusuku ezintabeni beququdwa ngamakhaza.
UKhoza nguyena obekhiqiza amanye amahubo azwakala kulo mdlalo, kanti amanye uwasusela
Lo mcimbi wangoLwesibili ubusezingeni eliphezulu njengoba bekukhona nabalingisi abangeyona ingxenye yalo mdlalo, kodwa abazwakalise ukuwuthakasela nentshisekelo yokuwubona.
Lo mdlalo ugabe ngabalingisi abanohlonze, okubalwa kubo uNomzamo
Mbatha, uNtando Zondi, uSenzo Radebe, uBongumusa Mthembu, uLemogang