'INKINGA YOKUSHODA KOTHISHA IHLASELE UMHLABA WONKE'
KUGQUGQUZELWE intsha yakuleli 'eyizifundiswa’ ukuba ikhuthalele ukufaka izicelo zomsebenzi wobuthishela nakwamanye amazwe njengoba inani lothisha lishoda umhlaba wonke.
Lokhu kuvele engqungqutheleni yezinsuku ezintathu esongwe izolo ngoLwesithathu, obekudingidwa kuyo inkinga yokushoda kothisha kuleli nakwamanye amazwe omhlaba.
Le ngqungquthela beyihlehlwe yi-United Nations Educational, Scientific and Cultural Organization (Unesco), ngokubambisana noMnyango wezeMfundo eNingizimu Afrika.
Isekela loMqondisi-jikelele e-Unesco, uNkk Stephania Giannini, liveze ukuthi kushoda othisha abalinganiselwa ku-44
emhlabeni wonke. “Inkinga yokushoda kothisha ingeyomhlaba wonke. Emazweni asezansi nezwekazi lase-Afrika kumele kwengezwe othisha abalinganiselwa ku-15 ukuze sikwazi ukwethula imfundo esezingeni kubo bonke abafundi.
“Ngakho-ke kumele sithathe izinyathelo, siphinde sinciphise inani labantu abashiya phansi imisebenzi yobuthisha, bafudukele kweminye.
“Kumele sikhumbule ukuthi lo mkhakha udlala enkulu indima ekuthuthukisweni komnotho wamazwe,” kusho uNkk Giannini.
UNgqongqoshe weMfundo eyiSisekelo kuleli uNkk Angie Motshekga obeyingxenye yale ngqungquthela, uveze ukuthi nakuba bebaningi othisha abahleli emakhaya kuleli, kodwa baya-shoda ngoba kabanazo iziqu zokufundisa izifundo ezishodelwa ngothisha.
Uthi baqeqesha ithimba lothisha elizoba wusizo kuleli nakwamanye amazwe, ngokufundisa izifundo zesimanje.
“Inkinga esinayo eNingizimu Afrika ithanda ukwehluka, ngoba sinothisha abaningi abahleli emakhaya, kodwa sisashodelwa ngothisha ezikoleni.
“Lokho-ke kudalwa ukuthi othisha abashodayo yilaba bezifundo zesimanje, ezifana neRobotics, iMotor Mechanics neEngineering, nezinye ezisanda kwethulwa kuleli,” esho.
Uthi uyethemba ukuthi izethulo ezethulwe kule ngqungquthela zizokwelekelela ekuqhamukeni nezixazululo enkingeni yokushoda kothisha kuleli.
Okunye akuveze njengesixazululo kule nkinga wukuthi othisha asebesondele eminyakeni yempesheni, basheshe bayithathe ukuze kuvuleke izikhala kothisha abasebasha.
“Kulaba abaneminyaka esukela ku-55, sicela badedele intsha esenamandla, esengakwazi ukugijima iminyaka engaphezu kuka-30.
“Lokhu kuzokwelekelela nangokwehlisa izikhalazo zothisha abahleli emakhaya neziqu.”
Kuyo le ngqungquthela, kuvele ukuthi iNingizimu Afrika ikhiqiza othisha abalinganiselwa ku-30 000 ngonyaka, kanti abanye babo sebeqalile ukufundisa isiNgisi emazweni angaphandle, afana neChina neSouth Korea.