Bazimisele ngokubukela kobhuti beDowns
Injejane yale kilabhu ifuna ukuketula eyePirates kwiDDC
BAFUNA ukuhamba ezinyathelweni zobhuti abadala abadlali abagijima kwiMamelodi Sundowns Reserves ezama ukuhlwitha iqatha emlonyeni kwinjejane ye-Orlando Pirates eziholayo kwiDStv Diski Challenge (DDC). Injejane yeDowns ilele endaweni yesibili kwi-log.
IDowns izokwamukela iCape
Town City Reserves ngoMgqibelo ngo-10h00 eLucas Moripe Stadium, ePitoli, ihambela phezulu njengoba ngeledlule ibhudluze AmaZulu FC Reserves ngo-3-0.
USinethemba Badela (osesithombeni) opheka iSundowns Reserves, utshele ILANGA ukuthi ukunqoba yinto abayigxilisa kubadlali besebancane, besafika nje kule kilabhu. Uthi okwenza ukuthi izinto zibe lula wukuthi zonke izikwati zeSundowns zizilolongela endaweni eyodwa, okwenza abadlali abasakhula bafunde lukhulu kwabadala.
“Ngaso sonke isikhathi uma kukhona abadlali ababizelwa emaqenjini esizwe kumbe behambile ngenxa yemidlalo emikhulu yeCaf, laba abasakhula banikwa ithuba lokuziqeqesha nesikimu esikhulu ukuze basheshe bajwayele khona. Kubalulekile ukuba bazethembe besakhula ukuze bangashaywa wukwesaba uma ithuba selivela,” esho.
* Kuzo ezeDDC, kubhekwe buphele ubungani phakathi kwabaqeqeshi bamaZulu FC azoshukana nePirates Reserves koweDDC ngoMgqibelo ngo-10h00 eRand aphekwa nguJoseph “Dukuduku” Makhanya no-Andile “Sguda” Cele abangabangani abakhulu kusukela besadlala kwiBucs.
USguda uthi usalwa nokubuyisa ukuzethemba kubadlali boSuthu ngemuva kwesibhaxu seDowns sangeledlule.
* Isiyonke imidlalo yeDDC engempelasonto imi kanjena: NGOMGQIBELO
E-Isak Steyl: Sekhukhune Reserves vs Arrows Reserves 10h00; Swallows Reserves vs AM Reserves 12h00.
ELucas Moripe: Sundowns Reserves vs Cape Town City Reserves 10h00.
EWolfson Park: Chippa Reserves vs Polokwane Reserves 10h00.
ERand Stadium: Pirates Reserves vs AmaZulu FC Reserves 10h00.
NGESONTO
ELucas Moripe: SuperSport Reserves vs Spurs Reserves 10h00.
ETsakane Stadium: TS Galaxy Reserves vs Chiefs Reserves 12h00.
E-Idas Valley: Stellenbosch Reserves vs Richards Bay Reserves 12h00.
mfanafuthin@ilanganews.co.za