Kubhekwe izikhathi ezinhle kwiBest of the Best Marathon
Abadidiyeli bancoma umzila nama-pace setter abagabe ngawo
Bamaningi abasubathi abazokuba yingxenye yeBest of the Best Marathon ezokuba ngeSonto ngo-5 ekuseni isukela emgwaqweni uMasabalala Yengwa iphelele ngaphakathi eKings Park Athletics Stadium, eThekwini.
Lo mjaho ngowokwenza izikhathi zokubekisa indawo kwiComrades nakwiTotalsports Two Oceans Marathon, okuyimijaho emikhulu kuleli.
UMthoko Khuzwayo onguSihlalo wamaRavens Athletics Club ahlela lo mjaho, utshele ILANGA ukuthi sebemi ngomumo, sebelinde usuku lwalo mjaho.
UKhuzwayo uthi umjaho uzobe uhambisana ne-21km ne-10km. IMarathon ne-21km izoqala ngo-5 ekuseni kuthi i-10km iqale ngo-6. Abe-42km nabe-21km bazohamba ngomzila owodwa, ngeke bahlangane nabe-10km.
“Izinhlelo zomjaho zihamba kahle kakhulu. Nonyaka sinamapace setter amaningi ukusiza abagijimi ukuba bakwazi ukwenza izikhathi abazidingayo ukuzibekisela indawo kwiTwo Oceans nakwiComrades.
“Kune-pace setter ezokube yenza u-3h00 kwiMarathon, kube khona eka-4h50, eka-4h00, eka-4h20, eka3h40 njalo njalo.
“Lokhu sikwenzele abasubathi ukuze bazitholele ithuba lokuma endaweni engconywana kule mijaho abaya kuyona. Nakwi-21km ne-10km sinawo ama-pace setter ukusiza abasubathi ukwenza ngcono izikhathi abanazo kula mabanga,” kusho uKhuzwayo.
Uthi izinombolo zizolandwa kusasa ngoLwesihlanu nangoMgqibelo eKings Park Athletics Stadium, lapho kuzophinde kwamukelwe khona imingenelo.
Uthi nonyaka balindele abasubathi abawu-3 000 sekuhlangene wonke amabanga, kanti ngendlela imingenelo engena mawala ngayo, kungenzeka basheshe bavale.
“Besilindele abasubathi abawu3 000 ngesikhathi sivula online. Besenze ama-t-shirt awu-3 000, laba abazobhalisa ngemuva kwalokho bazothola izindondo kuphela nazo eziwu-3 500. Uma sifika ku-3 500, sizophoqeleka ukuvala ngoba izokube ingasekho into esizoyinika abagijimi,” esho.
Izingqwele zeMarathon zizohlomula ngo-R15 000 kubona bobubili ubulili, kube u-R5 000 kwi-21km no-R3 000 kwi10km. UKhuzwayo uphethe ngokuncoma umzila ezinhle.
Kulo mjaho kubhekwe abasubathi ukuba benze ngcono isikhathi esiwu-2:16 owenziwa nguNkosikhona Mhlakwana eminyakeni edlule. Ku-21km irekhodi lakhona liphethwe nguTebello Ramakogoana okuwu-1:03 kanti ele-10km liphethwe nguSiyabonga Ndlovu u-28:08.
Umsubathi obhekwe ukuba enze kahle kulo mjaho nguRufus Photo weBlack Diamond, onamagolide amaningi kwiComrades Marathon.
Abafuna ulwazi ngalo mjaho bangaxhumana noKhuzwayo enombolweni ethi: 082 589 5102 noma uMbali Xaba kwethi: 084 792 2224.
ITwo Oceans izokuba ngempelasonto yePhasika kanti iComrades izokuba mhla ka-9 kuNhlangulana (June) isukela eThekwini isongwe eMgungundlovu.
* Abasubathi beTrack & Field bazokhiphana inkani kwiKwaZulu-Natal Junior Track & Field Championships ezokuba seMgungundlovu kusuka kusasa ngoLwesihlanu nangoMgqibelo.