'Zidinga ucwaningo olujulile izinkinga zeChiefs' – Johnson
Umqeqeshi uthi sebebheke ukuqeda isizini ngenothi eliphezulu
UMQEQESHI weKaizer Chiefs uCavin Johnson uthi zidinga ucwaningo olujulile izinkinga ezikhungethe le kilabhu osekuphele iminyaka ewu-9 inganqobi neyodwa inkomishi kwezibangwa kwiPremier Soccer League (PSL).
Lo mqeqeshi uthi kuzofanele bazinuke amakhwapha, bacabange ngabazimisele ukukwenzela le kilabhu esalokhu iqhubekile nokuphoxa abalandeli bayo.
“Kuzofanele senze ucwaningo olujulile, siphinde sizinukisise amakhwapha.
“Lapha ngikhuluma ngethimba labaqeqeshi, nabadlali abanezinkontileka ezinde kuneyami.
“Kufanele sinqume ukuthi yini okufanele siyenze emidlalweni ezayo ukuze sizokuba nesizini ehloniphekile futhi engcono, sikwazi ukuyiqeda (isizini) ngenothi eliphezulu ukuze sitshengise umphakathi nabezindaba ukuthi sifuna ukwenza uguquko,” kusho uJohnson.
IChiefs izobhekana nomkhaya iMoroka Swallows koweDStv Premiership ngoMgqibelo ngo-17h45 eFNB Stadium, eSoweto.
IChiefs iya kulo mdlalo nje, iyinhlekisa ezinkundleni zokuxhumana ngemuva kokuwashiswa ijezi yiMilford FC kuba ngu-5-4 wamaphenathi koweLast 32 yeNedbank Cup ngeSonto ebusuku eFNB Stadium.
Umdlalo ubuphele zibambene ngo-0-0 nale kilabhu yaseRichards Bay, KwaZulu-Natal, egijima kwiMotsepe Foundation Championship. Kungokokuqala emlandweni wesiMpofana ukuthi ziqede inqwaba yamasizini zinganqobi lutho.
Phela bezidume ngokuwola izicoco ngawo wonke amasizini kusukela zasungulwa ngo-1970.
Izinto zijike ngemuva kwesizini ka-2014/15 ngesikhathi le kilabhu ibhekana ngeziqu zamehlo nabadlali ababewumgogodla wayo, okwenza abanye okubalwa kubo owayengukaputeni uTefu Mashamaite noMandla Masango bagcina ngokuyishiya, kwabuyiswana sekukubi no-Itumeleng Khune ongunozinti.