KUXOSHWE ISISEBENZI SAKWA-IEC NGOKUDALULA UHLU LWAMAGAMA
INHLANGANO eyengamele ukhetho i-Independent Electoral Commission (IEC), ithi isikhombe indlela isisebenzi esisolwa ngokuputshuza uhlu lwabaphakanyiswe ukuthi bangenele ukhetho abangamalungu e-ANC neqembu elisanda kusungulwa iMK Party, ngempelasonto.
Lesi sisebenzi siputshuze uhlu lwalezi zinhlangano okhethweni lukazwelonke nolwezifundazwe.
NgoLwesihlanu olwedlule bekuwusuku lomnqamulajuqu obekumele amaqembu anikezele ngalo i-IEC, uhlu lwawo nobekuzobe sekuthi ngomhla ka-26 no-27 kwephezulu, kube yima le nhlangano ishicilela amagama alabo abakhethwe ngamaqembu abo.
NgoLwesihlanu ebusuku uhlu lwala maqembu lwase lugcwele ezinkundleni zokuxhumana, okushiye abaholi bamaqembu amaningi bekhathazekile njengoba babethi lolu hlelo kufanele ngabe luqashwe ngeso lokhozi yile nhlangano.
I-CEO yakwa-IEC, uMnu Sy Mamabolo ithe lesi sisebenzi singene kwikhompyutha yomsebenzi singavumelekile, sathatha uhlu ohlwini obelukade lungakashicilelwa ngokusemthethweni yile nhlangano.
Ithe uphenyo lwangaphakathi luthole ukuthi isisebenzi yisona esenze konke lokhu.
“Sikhathazeke kakhulu ngesigameko esenzekile, kodwa ukulusukumela phezulu kwethu kuyakhombisa ukuthi sizimisele ukwenza konke okusemandleni ethu ukuthi umsebenzi wethu wenzeka ngeqiniso nangokuthembeka.
“Ukuthembeka emsebenzini wethu ngenye yezinto esiziqhenya kakhulu ngayo njengoba konke esikwenzayo, kumele kube seqophelweni eliphephezulu.
“Noma yikuphi okunye okuphambana nemibandela yethu yokusebenza, siyokusukumela ngokukhulu ukushesha,” kusho uMamabolo.
Uphinde waveza ukuthi nesisebenzi sivumile ukuthi yisona esenze lesi sigameko.