Izibalo ngezomnotho zikhuthaza ukuba kusetshenzwe
Ukungabi bikho kwamanzi kulimaza amabhizinisi okuphoqa amafemu avale thaqa bese ethutha
UMNOTHO ukhule ngo0.1% ngekota yokugcina yango-2023, okusho ukuthi ngonyaka odlule, ukhuphuke ngo-0.6%. Yizibalo ezinhle ngaphandle uma usuqala ubheka ukuthi isibalo sabantu sikhula mawala kunomnotho wezwe. Abantu baseNingizimu Afrika sebehola okungenani imali ababeyihola ngo-2006.
Umnotho selokhu waqala ukwehla ngo-2013, okusho ukuthi sekuphele iminyaka ewu-10, ukhula ngaphansi kwendlela isibalo sabantu esinyuka ngayo.
Yinkinga esizidalele yona lena, ebangwa wukwehluleka kokuhlinzeka ngengqalasizinda nemisebenzi. Ukushoda kukagesi nezinkinga zezokuthutha, yizona zingqinamba ezinkulu ekukhuleni komnotho.
Yize ukucinywa kukagesi kunciphile ngekota yesine, izinselelo zezokuthutha beziyinkinga enkulu ekusebenzeni komnotho njengoba ukubambezeleka emachwebeni kumoshe izibalo zezimpahla eziphumayo nezingenayo ezweni.
Ukutshalwa kwemali nakho kwehlile ngekota yesine, kanti kugqame kakhulu ezakhiweni, emishinini yokuthutha nezokwakha. Yingakho kumqoka ukuthi silungise inkinga yezokuthutha futhi sibe silandelela ukubheka inqubekela phambili eyenziwayo ngenkinga kagesi.
Ezokuthutha nogesi zimqoka kwabamabhizinisi, yingakho sihlinzeke izinsizakusebenza, sisebenzisana nohulumeni ukuxazulula izinselelo.
Sibambisene nohulumeni emakomidini ahlanganiselwe lokhu, okuyiNational Energy Crisis Committee neNational Logistics Crisis Committee, ukuletha amakhono abamabhizinisi nezinsizakusebenza, okufaka nemali engaphezu kuka-R170 million esihlanganisiwe ngabamabhizinisi ukweseka womabili lamakomidi.
Sibambisene nge-Electricity Action Plan neNational Freight Logistics Roadmap, okungamaqhinga amabili amahle asho ukuthi singaluletha kanjani ushintsho oluzosiza unomphelo, kanjalo nezisombululo ezisheshayo zesikhashana ukuxazulula lezi zinkinga zombili.
Kazikho izizathu okufanele zisivimbele ukulungisa lokhu. Sinazo izinsizakusebenza futhi sinawo amaqhinga, kanti uma nosopolitiki befuna, sizophumelela.
Ingozi wukuthi ngonyaka wokhetho, ziningi izinto eziphazamisanayo ngesikhathi sidinga ukugxila ekuletheni izinguquko ezidingekayo. Yisikhathi futhi okumqoka ukuthi sihlele ukubhekana nezingozi ezintsha emnothweni.
Okwamanje inkinga yamanzi
ezweni yiyonanto ekhathaza kakhulu. Sesibonile ukuthi ukungabi bikho kwamanzi komasipala kungalilimaza kangakanani ibhizinisi, okuphoqa amafemu ukuthi avale futhi athuthele kwezinye izindawo.
Izinkinga zamanzi zibonakala zanda njengoba imibiko ngesonto eledlule iveze ukuthi ompompi bomile kusukela eMbombela kuya eningizimu yeGoli. Kuthiwa lokhu kudalwa wukuguga kwengqalasizinda, wukucinywa kukagesi nokuthi izinto azikhokhelwa.
Iyakhathaza indlela izinkampani ezinkulu ezikhiqizayo nezimayini ezihlinzekwa ngayo ngamanzi njengoba lokho kubeka umnotho engozini kakhulu.
Kasikwazi ukuzithola sesiyilungisile inkinga kagesi neyezokuthutha kodwa bese sithola sinenkinga entsha esho ukuthi umnotho awukhuli.
Yize ukulungisa lezi zinkinga ezikhona ngokushesha kubalulekile, kodwa masibeke amehlo enkingeni enkulu elandelayo.
Njengoba ngibhalile ngesonto eledlule, ukunqamuka kokutholakala kwegesi ezinkampanini ngenye inkinga esemome.
Kufanele sikugweme ukusukuma emuva kwendaba, ukuqinisekisa ukuthi amakhasimende egesi kawazitholi engondingasithebeni ngo-2025, uma labo okuthengwa kubona igesi sebeyeka ukuyidayisa.
Imizamo eyenziwayo kufanele igxile kokubalulekile okuwumnotho. Ugesi, ezokuthutha, igesi, amanzi yizinto zonke ezikhulisa umnotho, futhi yizinto ezimqoka ezifana nokulwa nobugebengu nenkohlakalo.
Izibalo zomnotho ezikhishwe ngesonto eledlule zihlaba ikhwelo kakhulu lokuthi kufanele sinyakaze masinyane.
Abantu baseNingizimu Afrika baya ngokuya behlupheka futhi izifiso zabo zokusebenza, bangenise imali futhi banakekele imindeni yabo, ziyaphazamiseka.
Kusezandleni zikahulumeni nabamabhizinisi ukusebenzisana ukweseka umnotho nokuqinisekisa ukuthi izimboni zisebenza kahle ukwenza umsebenzi ofanele.
Enye yezinto ezimqoka wukweseka uhulumeni usebenze kahle. Sifuna uhulumeni osebenzayo, ohlinzeka izidingo kwabamabhizinisi nasezweni lonke.
Sifuna abantu nabamabhizinisi bathole izidingo ezinohlonze komasipala nohulumeni kazwelonke, kanjalo nasemabhizinisini kahulumeni.
Lokhu akusho nje ukubhula imililo, kodwa kusho ukusebenza ngendlela esezingeni elifanele ukweseka uhulumeni usebenze kahle, uhlinzeke ngezidingo futhi ugweme ukuthi inkinga ibe khona kwasekuqaleni.
Lowo wumsebenzi omqoka esigxile kuwo. Ukubambisana kwabamabhizinisi nohulumeni kumqoka ekuzuzeni lokho esikufunela iNingizimu Afrika.
Ngifisa ukungasebenzi kahle komnotho esikubone kule minyaka ewu-10 edlule, kube wumlando, futhi ngiyazi abaningi kuhulumeni bafuna into efanayo.
Masiphuthumeni sisebenze ukuze kwenzeke lokho.
UNkz Mavuso uyisikhulu esiphezulu seBusiness Leadership South Africa