Unqunywe umlomo ngekusasa oweDowns ogaqelwe ngeyaseFrance
UTebogo Mokoena uthi bafuna ukuzishanela izicoco abasasele kuzona
UNQUNYWE umlomo ngodaba oluthinta ikusasa lakhe uTeboho Mokoena (osesithombeni) ongumdlali weMamelodi Sundowns ovutha engabaselwe kulezi zinsuku.
IDowns ibambane neSuperSport United ngo-1-1 koweDStv Premiership ngoLwesibili ebusuku eLoftus Stadium, ePitoli. UMokoena - oqokwe njengomdlali ovelele - nguyena ovule inkundla ngenguzunga yegoli ayishaye engaphandle kwebhokisi.
Nokho igoli lakhe elihle licinywe ngelikaBradley Grobler abadlale naye iminyaka kwiSuperSport.
Lo mdlali ebuzwa emuva komdlalo ukuthi njengoba izinga lakhe selenyuke kakhulu kunakuqala emuva kokuba ebuye kwiAfcon, ngabe usekulungele yini ukushiya iDowns alibhekise e-Europe njengoba kunekilabhu yaseFrance emfunayo, uthe: “Kangivumelekile ukukhuluma ngalolu daba okwamanje, nakimina into esekhanda wukusiza iSundowns izuze lokhu ekuhlosile ngale sizini. Sisalelwe yiligi, yiChampions League neNedbank
Cup.
“Yonke le miqhudelwano sifuna ukuyinqoba. Kodwa-ke sibheke umdlalo ngamunye. Umdlalo wethu neSuperSport ubunzima. Ngabe ngenza iphutha uma ngingase ngingayibongi ngoba ngilana engikhona nje kungenxa yayo (iSuperSport).
“Iyohlezi isenhliziyweni yami. Kodwa-ke njengoba bengishilo into ehamba phambili kimina njengamanje yiSundowns.”
* Kungena eleChampions League nje, iSundowns iqhathwe neYoung Africans yaseTanzania kuma-quarter final azokuba ngempelasonto yePhasika kuthi imidlalo yomlenze wesibili ibe ngempelasonto yokuqala kaMbasa (April).
La makilabhu aqhathwe kanje, esekuqaleni izowudlalela ekhaya umlenze wokuqala:
Esperance vs ASEC Mimosas; Simba SC vs Al Ahly; TP Mazembe vs Petro de Luanda; Young Africans vs Mamelodi Sundowns.