UKUJIMA KUYINKINGA UMA ISIHAMBILE IMINYAKA
SIGUDLA NOGALAKAJANA:
SIYAFIKA isikhathi kithi sonke lapho ukuzivocavoca kungasabalulekile ngale ndlela okwakusemqoka ngayo sisakhula.
Kwala noma odokotela sebesitshela, sivume nje, kodwa singakwenzi.
Phela uma usuhlanganise iminyaka engamashumi amane noma ayisihlanu, ukuzivocavoca kuba wumsebenzi ovele ukukhathaze usawucabanga.
Kodwa ngoba imali isuke isikhona sijimisa yona, sithenge yonke inhlobo yemishini yokuzivocavoca siyibeke egunjini elikhethekile njengoba nezingane seziphumile zayosebenza, zazitholela izindawo zokuhlala.
Isiyolala uthuli lapho, silokhu siyivakashela ngale mishanelo okuthiwa ngama-feather duster. Uthi njalo uma udlula kulelo gumbi, uvule umnyango uyibuke le mishini bese uyayisongela uthi liyofika usuku lapho uyoyibonisa khona ugenebusi.
Edlule amasonto azale izinyanga, nazo zizale iminyaka ilokhu ikubuka kancane nje le mishini uma udlula ithi, “woshi, nangu edlula lona osisongela mihla namalanga. Kanti lo genebusi uyosibonisa nini wona?”
Eminye ihleke insinini ithi, “akunagenebusi wasibonisa wona lo mlisa edonswa wumkhaba nje sengathi uzithwele”.
Imishini kuba yinto esixoxa ngayo etshwaleni, uzwe ebuza uMpungose ethi: “Milazi, uyawazi lo mshini wokunciphisa isisu lona okuguqwa kuwo ngamadolo bese utshikizisa isinqe okuthiwa yi
bionic abs machine?
“Ungawubuka uweye kanti hheyi wena, uvele unganyakazi ngisho ukunyakaza.”
Hhawu isiqalile njalo, sonke sesibala esinayo nesingenayo. Uma sisuka lapho siyoyithenga, yize singayisebenzisi kwalena esinayo. Uma sesihlangana futhi sixoxa ngale emisha esiyithengile.
Kwafika ukhuvethe kwaba nzima. Phela ubuzithola usuhlezi kuyo le mishini, uphuza ubhiya, ubhizi ucofoza amabhathini. Lwathi uma luphela, yaqala inkathazo. Kwaqala imijaho yokuqoqa imali yomdlavuza nokuningi nje engingenandaba nakho.
Mina kanginankinga ukunikela imali yokusiza abagulayo nabentulayo, kodwa ungangitsheli ukuthi kumele ngigijime noma ngihambe amakhilomitha ngamakhilomitha, ngishiswa yilanga ehlobo ukuze nginikele.
Ngikhumbula ngimenywa ukuhamba amakhilomitha angamashumi amathathu okwakuthiwa sixwayisa noma sazisa amadoda ngomdlavuza walesi sitho esingaphansi kwesende okuthiwa yi-prostate.
Kangiboni ukuthi kwasiza lokho ngoba abantu abaningi kabasibonanga sihamba.
Kwakuzoba ngcono kakhulu futhi kube nempumelelo ukuba bashicilela okuthiwa phecelezi, ngama-flyers nama-pamphlet, bawanike amadoda emarenki, emashibhini, ezinkundleni zemidlalo nakwezinye nje izindawo ezihlangana amadoda.
Uma usukhulile ukuphumula ukuthokozela ngendlela engakaze ibonwe. Unokuthatha isihlwathi nje kusaphele amahora amabili uvukile, uphinde futhi emuva kwesidlo sasemini. Kokunye uthi usaphumuza umzimba ntambama, bese ulala kuze kushaye isikhathi sokulala.
Uvuke lapho uthethise izingane, uzibuza ukuthi azikuvusanga ngani ngoba nakhu usucishe wedlulwa yisikhathi sokulala. Phela isikhathi sokulala sibalulekile, kawufuni ukuphuthwa yiso.
Nezinhlelo zikamabonakude ezingena ngehora lesishiyagalombili awusazibukeli ngoba usuke usulele ngaleso sikhathi. Usubukela izinhlelo zasemini njengojahidada.
Ukuzikhipha nowakwakho ebusuku kuba yinkinga. Kuthi nisaqeda ukudla okuqalwa ngako okuthiwa phecelezi, ngama-starters, nisalinde okwangempela, wena ube usuzicabangela umbhede.
Nombhede owuthengayo ngobizayo, onomatilasi ontofontofo sengathi ulala amaqanda, ngoba kawufuni ukuvuka kubuhlungu umzimba ngenxa yomatilasi ophenduka isikebhe uma ulele.
Ukuhlala kusofa nakho kukwenza ubikelwe ngoba phela uma usufuna ukusukuma, akusukumeki uze ubize izingane zikudonse. Uma uke wazama ukuzisukumela ngenkani, uzozwa ngeminjunju ezansi neqolo.
Leyo minjunju iyophola emuva kwamasonto usuphuze yonke inhlobo yephilisi lezinhlungu. Ngakho yonke into oyenzayo awujahi, uthatha isikhathi sakho.
Uthi uma uyibheka imishini yokujima, uvele uzibone usuphinyazeke edolweni noma eqakaleni, okuyizinto ezizothatha izinyanga ukuphola. Usugwema yonke into enokuzikhandla phakathi.
Nomchamo uqala ukuhlupha, uthi usuqedile wenyusa uziphu kuvele kuphume iconsi lokugcina ongazi ukuthi belicashephi. Udokotela akutshele ukuthi kumele uyithintithe induku umzuzu wonke.
Uvele ubone nje usuthintitha induku umzuzu wonke ethoyilethi lomphakathi, amanye amadoda esekubuka, ecabanga ukuthi ushaya indlwabu. Kunzima ukukhula.