“UKUXOSHWA KWABAHOLI BE-MK NGEKE KULIHLAKAZE IQEMBU”
UMHLAZIYI wezepolitiki uSolwazi Bheki Mngomezulu uthi akakholwa wukuthi ukuxoshwa kwabaholi abaqavile beMK Party kuzoba nomthelela osungayilahlekisela ngamavoti okhethweni.
Uthi futhi akakholwa wukuthi ukuxoshwa kwalaba baholi sekungaholela ekutheni lihlakazeke iqembu ngenxa yokungeneliseki kwabathile.
Isematheni indaba yokuxoshwa kwalaba baholi okubalwa kubona uMnu Jabulani Khumalo
okunguyena owabhalisa iqembu, nguMnu Ray Khumalo, nguMnu Bheki Manzini, nguMnu Lebo Moepeng, noNkz Rochelle Davidson.
USolwazi Mngomezulu uthi njengoba kunezinto okusolwa ukuthi baxoshelwe zona laba baholi, into esemqoka yindlela iqembu elizoqhubeka ngayo lisingatha indaba yabaholi abasuke besolwa ngokungaziphathi kahle ngaphakathi.
Ngokusho kwakhe, osekungadala inkinga, kulimaze iqembu wukuthi uma kukhona abanye abaholi abasolwa ngokwenza okungalungile, bese kuthanjiswa isandla kubona, bengajeziswa ngendlela efanayo nalaba abaxoshiwe.
Kwenzeka lezi zinguquko zakamuva zokuxoshwa kwalaba baholi, kungekudala iMK Party idilize uMnu Nhlanhla Ngidi esikhundleni sokuba ngumxhumanisi weqembu KwaZulu-Natal.
Ngaphambi kwalokho, bekukade kudilizwe ezikhundleni uMnu Bonginkosi Khanyile obebanjiswe kwesokwengamela uphiko lwentsha lwale nhlangano, nguMnu Gaan Cibane obebanjiswe kwesikanobhala jikelele wophiko lwentsha, kube nguMnu Thapelo Maisha obebambe esokuba yisekela likamengameli wophiko lwentsha, noMnu Gazuzu Nduli obebanjiswe esikhundleni somxhumanisi wenhlangano eGauteng.
NgeSonto iSunday Times ibike ukuthi kunamahlebezi okuthi laba baholi abaxoshiwe, babe nemihlangano eyimfihlo ne-ANC, abengenalwazi lwawo uMnu Jacob Zuma. Kuwona futhi umbiko weSunday Times, kuthiwa futhi uKhumalo usolwa ngokuqoqa iminikelo ngegama leMK Party, kodwa leyo mali angayedluliseli eqenjini.