Bazoyikhotha imbenge yomile abazophazamisa ukhetho - uhulumeni
NJENGOBA sekusele izinsuku ezingaphansi kweziwu-30 kuyiwe okhethweni lukazwelonke nezifundazwe ngomhla ka-29 kuNhlaba (May) nonyaka, uhulumeni usuqinisekise umphakathi ukuthi wonke amathimba ezokuphepha nokuvikela ami ngomumo ukuqikelela ukuthula ezweni.
“Sizokwenza konke okusemandleni ethu ukuvikela bonke labo abafuna ukusebenzisa ilungelo labo lokuvota elikumthethosisekelo,” kusho uNkk Thandi Modise onguNgqongqoshe wezokuVikela (osesithombeni).
UNkk Modise uyingxenye yethimba elididiyelwe lezobulungiswa, ukunqanda ubugebengu, nezokuphepha elibizwa ngeJustice Crime
Prevention and Security (JCPS).
Esigcawini sabezindaba ngeSonto, leli thimba lethule umbiko ngamalungiselelo ezokuphepha ngokhetho. Ekhuluma kusona uNkk Modise, uthe ukuqikelela ukuphepha kwabavoti kuyinto eseqhulwini kulolu khetho okubhekwe ukuthi umncintiswano wamaqembu alungenele ube nzima kakhulu kunasezinkethweni ezedlule.
Abalelwa ku-70 amaqembu epolitiki angenele lolo khetho, bese kuba namalungu omphakathi awu-11 alungenele ngokuzimela. I-JCPS yedlulisele umyalezo oshubile oqondiswe emphakathini, ikakhulukazi kulabo abayokwephula umthetho.
“Njengabaholi abasethimbeni leJCPS, sifuna ukwedlulisela umyalezo ocacile wokuthi ngeke kubekezelelwe ukugqugquzela udlame, ukwephulwa komthetho, ukuphazanyiswa kwengqalasizinda, noma ukuvalwa kwemigwaqo.
“Noma ngubani ozibandakanya kunoma yiluphi uhlobo lwesenzo sobugebengu kuyobhekwana naye,” kusho uNkk Modise.
Wenze isibophezelo sokuthi beyiJCPS bazokwenza isiqiniseko sokuthi wonke amalungelo abantu aqukethwe kumthethosisekelo avikelekile.
Ugcizelele ukuthi nakuba kuvumelekile ukuba abantu babhikishe, bazwakalise izikhalo zabo, kodwa abazibandakanya kwimibhikisho, kumele bakwenze lokho ngokuthula, banganyatheli amalungelo alabo abangafuni ukuzibandaka-nya nayo.
Ngokusho kukaNkk Modise, izinhlaka eziqondene nokugcinwa komthetho sezilubumbile uhlelo lwezokuphepha kuzwelonke futhi lwaphasiswa ngongqongqoshe abayingxene yeJCPS.
Kubikwa ukuthi uMnyango wamaPhoyisa nabaphathi abaphezulu emaphoyiseni sebehambele kuzo zonke izifundazwe, behlola ukuthi ngabe amaphoyisa ami ngomumo yini ukuqikelela ukuphepha komphakathi.
UNkk Modise uthi umnyango nabaphathi bamaphoyisa bagculisekile ngezinga lamalungiselelo ezokuphepha kuzo zonke izifundazwe nezifunda.
UNgqongqoshe wamaPhoyisa uMnu Bheki Cele, uthi ezikhungweni zokuvota ezweni ezibalelwa ngaphezu kuka-23 000, bahlonze ezibalelwa cishe ku-500 ezingahle zibe nobungozi obukhulu, okumele ziqashelwe ngelokhozi. bhekin@ilanganews.co.za