I-IFP YETHULE IBHASI UKUQINISA UMKHANKASO WAYO
LIZOZUNGEZA wonke amagumbi amane esifundazwe ibhasi lomkhankaso we-IFP elethulwe ngokusemthethweni emphakathini ngoMgqibelo.
Leli bhasi elinezikhuthazi zokuvotela leli qembu, lethulwe ngosuku lwenkululeko njengoba liwuqalile umsebenzi walo ngawo uMgqibelo, lizungeze enkabeni yeTheku ladlulela eMlazi ngaphambi kokuba liyoyivala eFolweni lapho leli qembu beligubha khona usuku lwenkululeko.
UMengameli we-IFP uMnu Velenkosini Hlabisa, uthe ukuba khona kwaleli bhasi, lizobe lihamba emphakathini liyoqinisa umkhankaso wabo njengoba bese beqalile ngokwethula indiza enophephela emhlane, nayo esiqalile ukubangisa abantu umsindo.
UHlabisa uthe kumele abantu baliqaphele leli bhasi, lizobe lihamba phakathi kwabo. Uthe ngenxa yokuqinisa umkhankaso wabo, sekuphoqeleke ukuba bashintshe imihlangano yeqembu abavamise ukuyibamba ngoMsombuluko yaba ngeSonto ebusuku.
UHlabisa uthi kulolu khetho ngeke bagxile KwaZulu-Natal kuphela emikhankasweni yabo, bazimisele ukuthi i-IFP imeleleke kuzona zonke izifundazwe. Ukusho lokhu ebalula ukuthi basazoya eMpumalanga.
Useke waya naseFree State nalapho leli qembu elizimisele ukukhula khona kulolu khetho.
Uthe ukusabalala nakwezinye izifundazwe kudalwe yizicelo zabantu abebelokhu bekhala ngokuthi bayayithanda i-IFP, kodwa kabayiboni ezifundazweni abahlala kuzona.
Kulo mkhankaso bekukhona noMnu Thami Ntuli okunguyena leli qembu elifolosa ngaye esikhundleni sokuba ngundunankulu wesifundazwe njengoba kuza ukhento lwangomhla ka-29 kuNhlaba (May).
UMnu Narend Singh onguMgcinimafa waleli qembu, uphawule ngesikhalo esenziwe yiNFP emasontweni amabili adlule lapho leli qembu lasola i-IFP ngokuphazamisa umcimbi walo ngokundiza kwebhanoyi elinophephela emhlane.
Le ndiza enefulegi elinobuso bomsunguli we-IFP, iNkosi uMangosuthu Buthelezi noHlabisa, yadlula ngaphezulu kwalapho kwakunomcimbi weNFP khona okuyinto eyasusa umsindo.
USingh uthe kuyamangaza ukukhala kwaleli qembu ekubeni lazi kahle ukuthi indiza enophephela emhlane kayimane isuke izihambele, kodwa kunemigudu eyenziwa izinsuku ngaphambi kokuthi indize, kwaqondana ukuthi ngalolu suku nayo le ndiza yayijutshwe esifundeni iZululand.
Uthe kule mpelasonto ibijutshwe eThekwini namaphethelo, ngakho uma kukhona iqembu elizobe likhankasa, kuzobe kungeyona inhloso yabo ukuthi liphazamiseke.