'Uxolise wavalelisa isinqandamathe ngengoma, maqede wazilengisa'
Kuthiwa umufi bekunencwadi yasenkantolo emvimba ukusondela kunina wengane yakhe
KUTHIWA uvalelise waphinde waxolisa ngengoma ngaphambi kokuba azikhunge owesilisa waKwaXimba, ngemuva kokugwaza ephindelela isinqandamathe sakhe kubangwa ikhadi lasebhange, wasishiya silimele kanzima.
Ngokuthola kweLANGA, lesi sigameko senzeka nje, umufi uMnu Mondli Zondi (osesithombeni) ubesethole incwadi yesivimbelo yenkantolo ngemuva kokuhlasela unina wengane uNkz Nosipho Luthuli ngePhasika.
Kuthiwa ngoLwesibili, umufi waseSiweni khona KwaXimba, uye kocuthela unina wengane yakhe endlini yakhe abengasahlali kuyo ngoba ebalekela yena.
Kuthiwa ubuye ngoLwesithathu ebusuku, okuyilapho kuqale phansi ingxabano bebanga ikhadi likamufi lasebhange.
Imithombo yaleli phephandaba esondelene nalezi zithandani iveze ukuthi uZondi ubecwile ezikweletini, ekweleta omashonisa, kwabe sekungenelela uNkz Luthuli, wamephuca ikhadi lasebhange, lahlala kuyena enzela ukuthi uma ehola akwazi ukukhipha imali akhokhele omashonisa okuthiwa bese behlupha naye.
“Lona wesilisa ubesebenza kodwa ecwile ezikweletini zomashonisa, bese behlupha nonina wengane yakhe uma befuna imali.
“NgePhasika kukhona ingxabano equbuke phakathi kwabo, kubangwa lona ikhadi lasebhange (umufi) abefuna libuyele kuyena,” kusho umthombo.
Kuvela ukuthi ngemuva kwalesi sigameko uNkz Luthuli ubike emaphoyiseni, wagcina ethole incwadi evimba uZondi ukuba asondele eduze kwakhe.
“UNkz Luthuli ubesehlala ezihlotsheni ngoba ebalekela ukuthi baxabana njalo, futhi bese kuvele kunencwadi ethi uyise wengane yakhe makangasondeli kuye,” kusho umthombo.
ILANGA lithole ingoma eqoshiwe eculwa nguZondi ngaphambi kokuba azibulale lapho ebexolisa khona kuNkz Luthuli.
Izinhlamvu zale ngoma zithi: “Ngiyaxolisa sithandwa sami, bengingazimisele ukuxabana nawe.
“Ngiyaxolisa, ngiyaxolisa
MaMshibe. Ngiyaxolisa wena Vavavum Nosipho.
“Okwehlele mina kwaze kwabuhlungu. Ngivuke ngine-protection order (incwadi yesivimbelo) kodwa ngazithola sengikuwena ngoba bengikukhumbula.
“Bese ngikukhumbule ngenxa yokuthi bengingakwazi ukuhlala ngaphandle kwakho.
“Kubuhlungu okwenzeke kimi, ngamlimaza uNosipho ngingaqondile. Angazi kwenzeke kanjani, kodwa ngiyaxolisa.”
Kuthiwa entathakusa ngoLwesine, uZondi uzilengise esihlahleni esiseduze komgwaqo.
Iphoyisa elingagunyaziwe ukukhuluma nabezindaba liqinisekisile ukuthi lesi sigameko senzekile nokuthi kuvulwe idokodo ngokufa komuntu.