INDIDA NGOMFUNDI KA-MATRIC OTHOLWE KUBO ELIMELE, WAFA
SEKUQUBUKE indida emndenini womfundi kamatikuletsheni otholwe kubo elimele, waphetha ngokushona okusolwa owesilisa osondelene naye ngokufa kwakhe.
Kubikwa ukuthi uZinhle Khathi (18) waKwaDumisa, eMzinto, obenza umatikuletsheni eSphapheme High School, utholwe ngunina esephefumula okokugcina, egcwele igazi emzimbeni kulandela ukuba egcine ukubonakala nowesilisa owaziwayo.
Kuthiwa lesi sigameko esenzeke ngoLwesihlanu, senzeke uninakhulu kamufi esendlini, kodwa akezwanga lutho futhi akaboni emehlweni.
Ilungu lomndeni elicele ukuba lingadalulwa, lithi bewumndeni basadidekile ukuthi umufi ubenzeni le engaka ebingenza ukuba abulawe ngesihluku.
Uthi abazibonele bathe umufi ubegcine ukubonakala nowesilisa asondelene naye ngaphambi kokuba atholwe eselimele.
“NgoLwesihlanu unina kaZinhle ubesahambile, eye emtholampilo. “Ababonile bathi kube sekubonakala lona wesilisa engena endlini, wabe esezwakala ekhala uZinhle.
“Bathi kuphele isikhashana (lona wesilisa) wabonakala esephuma eshesha.
“Unina esebuya uzithele kuyena uZinhle esaphefumula, emadolweni ehuzukile, ibhulukwe abeligqokile lidabukile, kungathi ubehudulwa phansi ngalo.
“Ubesaphila kodwa ephefumula kanzima, wagcina eshonile,” kusho ilungu lomndeni.
Liqhuba lithi amaphoyisa abatshele ukuthi lona wesilisa amtholile kodwa waphika ukuthi ukwenzile lokhu, abe esemdedela.
“Amaphoyisa athi uwatshele ukuthi yena ubeye ekhaya ngoba eyombheka (umufi) ngoba ezwe ukuthi ubengaphilile, kodwa wamshiya ephila.
“Lokhu kuyasixaka ngoba bakhona omakhelwane abambonile engena, bamuzwa ekhala uZinhle.”
Okhulumela amaphoyisa uLt-Col Robert Netshiunda uthe kuvulwe idokodo ngokufa kowesifazane oneminyaka ewu-18.
Uthe lona wesifazane utholwe enamachaphazelo egazi okusolwa ukuthi uwile njengoba ubengaphilile.
Nokho uthe ukuhlolwa kwesidumbu yikhona okuzocacisa ngembangela yokufa kwakhe.
Okhulumela uMnyango wezokuThuthukiswa koMphakathi esifundazweni, uMnu Mhlaba Memela, uthe uNgqongqoshe uNkk Nonhlanhla Khoza usigxeke kakhulu isigameko sokubulawa kukaZinhle okuthiwa unengane eneminyaka emibili.
Ungqongqoshe uthe kuyakhathaza ukuthi abenzi bobubi bakholelwa ekuthini yibona abaphethe impilo yabesifazane.
Ube esedlulisa amazwi enduduzo emndenini kamufi.