OBEYIMENENJA KAMASIPALA ULAHLWE NGAMACALA OKUNGALANDELI IMITHETHO
UMHOLI wekhokhasi yeDemocratic Alliance (DA), kuMasipala iBaqulusi, uMnu Swelakhe Shelembe uthi bazimisele ngokubhalela umkhandlu walo masipala ukuthi ubheke ukuthi kazikho yini izinqumo ezithathwe emihla-nganweni emibili eyahlaliswa yimenenja exoshwe ngasekuqaleni kwesonto, uMnu Zwelihle Dlamini.
Ngonyaka odlule kugcine kumiswa uDlamini ngemuva kokuba amanye amakhansela ekhale ngokuthi ngomhla ka-28 kuNdasa (March), wahlalisa umhlangano okwakungafanele wekomiti lezemali.
Leli komiti uSihlalo walo kwakungumeya owayesefake incwadi yokusula uMnu Mncedisi Maphisa, kodwa waqhubeka nokumhlalisa kulo mhlangano okwakungasafanele ahlale kuwona.
UDlamini uphinde futhi asolwe ngokuhlalisa umhlangano owawungomhla ka-6 kuNtulikazi (July), lapho kuthiwa amakhansela ayekhona ayenganele ukuthi kungahlala umhlangano, kuthathwe izinqumo.
“Emkhandlwini wethu kudingeka amakhansela okungenani abe wu-23 ukuze umhlangano ube semthethweni, kodwa kulona amakhansela ayewu-19.
“Sathi uma silandelela ukuthi kwenzeke kanjani ukuthi usomlomo avumele lo mhlangano, kwaba wukuthi imenenja ithi nguyena uSomlomo uMnu N P Ndlela owavuma.
“Kwaphinde kwavela ukuthi uMaphisa kwakungafanele ahlale kuwona ngoba ngokwencwadi yakhe yokusula wayeyifake ngomhla ka-17 kuNdasa (March) okusho ukuthi wayengaseyona imeya ngesikhathi ehlala emhlanganweni wesigungu sezemali. “Nakho ukuthi imenenja imiswe emsebenzini ukuze kwenziwe uphenyo ngalobu budedengu, kube wumzukuzuku ngoba benosomlomo bagijimela ezinkantolo ukuze bangamiswa,” kusho uShelembe.
Kuvela ukuthi ngemuva kokukhononda ngemenenja kweDA, eyayikhala nangokuthi isizwile ukuthi i-IFP isimkhiphile esikhundleni uMaphisa, kwadingeka ukuthi kube nophenyo olwenziwayo, okuthiwa uDlamini wathi akafisi ukuthi kube yithimba elizobe liqokwe wumkhandlu elizophenya, okungenani makuqashwe abazimele.
“Inkampani ebiphenya ithole ukuthi wephula imithetho yokusebenza, yamlahla kuzona zonke izinsolo abebhekene nazo. Umkhandlu uthathe isinqumo sokuthi umxoshe uDlamini obemisiwe sonke lesi sikhathi,” esho.
Okunye okufake uDlamini obishini, kube wukuzwakala kwenkulumo eqoshiwe lapho ayetshela khona amakhansela ukuthi uma kuqashwa kuzolandelelwa izifiso zeqembu i-IFP.
Ngemuva kwale nkulumo eqoshiwe, leli qembu laziqhelelanisa nale nkulumo, lathi kalikwazi lona ukungenelela ekuqashweni kwezisebenzi.
“NgoMsombuluko sizobhalela umkhandlu kulo masipala ukuba sicele uphenye ukuthi kazikho yini izinqumo ezinqala ezithathwe kule mihlangano emibili ezingagcina zisifaka enkingeni ngelinye ilanga.
“Akukho okunye esesingakusho ngoDlamini ngoba uxoshiwe kodwa usomlomo siyafisa ukuthi kube nezinyathelo athathelwa zona naye,” esho.
Esikhundleni semeya kube sekungena uMnu Eric Mkhwanazi ongatholakalanga ukuphefumula ngalolu daba. nonhlakaniphos@ilanganews.co.za