KWAGCWALISEKA ISETHEMBISO SIKABHOMBELA MHLA NGIQALA UKUBONA UNYAZI
MHLELI: Uma ngikhumbula kahle, kwakuphakathi kuka-2009 no-2010 mhla ngibizwe ngomunye wabashumayeli eBuhleni, umshumayeli uNgidi, osengumVangeli, eThempelini, iBambisanani, oZwathini.
Umshumayeli uNgidi wayengibizele ukuba ngimbonise umsebenzi wami ayecele ukuthi ngiwenzele iNkosi uThingo, eBuhleni.
Kwathi sisahlezi nje ngaphakathi, amaNazaretha elindele ukunikela eNkosini ngemuva kwenkonzo yasemini, njengoba kwakuyiSabatha, ngezwa ngomshumayeli uNgidi engiqhweba, wangibuza ukuthi ngiyamazi yini ‘uM...’?’, esho igama iNkosi uNyazi eyayibizwa ngalo ngaleso sikhathi.
Ngaphendula ngathi: “Cha angimazi, kodwa ngike ngizwe umngani wami ekhuluma ngaye ngoba uyamazi.”
“Nangu ehlezi eceleni kwakho,” kusho uNgidi.
Kwathi uma ngiphendukela kulo uNyazi, ngazithela phezu kweNdlamhlathi uqobo lwayo, uBhombela isitimela samaMpondo, engimazela ezithombeni.
Kwathi uma ngikuqaphela lokhu, ngafikelwa wukuthi ngithi “uyiNgcweleeeh... Ahhmeeeni”.
Ngakhumbula ngaso leso sikhathi ukuthi kangikwazi ukukhuza iNgcwele kumuntu ongekho esihlalweni, ibe ikhona inkosi.
Ngakhumbula ngokuphazima kweso ukuthi uma ngenza njalo ‘ngizothandazelwa kabuhlungu’, ngazibamba.
Kodwa ekuzibambeni kwami, ngesikhathi sengilubingelela uNyazi, angiphelanga amandla ngoba ngazizwa ngenhliziyo, sengithi; “nguwe iNkosi yamaNazaretha elandelayo”.
Lokhu, ngakusho ngenhliziyo ngoba ngangibona uMqaliwendlela njengoba enjalo ezithombeni. Kwagcwaliseka kimi isethembiso sikaBhombela sokuthi uyobuya esiqwini sesihlanu.
Kunjalo eBuhleni bamaNazaretha namuhla.
Impela ngacishe ngathola induku kabuhlungu eBuhleni.
Kodwa ukube ‘ngathandazelwa’ ngaloluya suku, ngangiyosola yena uNkulunkulu uqobo ukuthi angafike angikhombise inkosi elandelayo, aphinde angiqhathe neNhlalisuthi kanjalo neNgudlungudlu ihlangene neNtabayepheza?
Cebolenkosi Maphumulo eNanda