Mawubhekwe umthelela wezingane ezikhuliswa ngabazali abayizingane
UCWANINGO lwakamuva luveza ukuthi liyakhula izinga lokukhulelwa kwezingane zingakakhuli ngokwanele. Imindeni nemiphakathi eminingi ikhungethwe ubhubhane lokukhulelwa kwezingane zisencane futhi kakubonakali izinga lalo mkhokha lidamba, kunalokho liyadlebeleka njengomlilo wasendle.
Ezikoleni kuyakhalwa, imitholampilo iphithiza zona izingane ziyoxukuza, kuze kube sengathi kuhle ngenxa yawo lo mkhokha wokuzithwala isikhathi singakafiki.
Konakelephi ngempela esizweni esimpisholo, owani lo mkhokha ohlasele izimbali zesizwe?
Ngithi ake ngisike elijikayo ngalolu daba lokukhulelwa kwezingane zisencane, zingakakulungeli ukuthwala umsebenzi ongelula wokuba ngumzali. Mhlawumbe kuyadingeka kugcizelelwe ukuthi kusho ukuthini ukuthi ingane kayikulungele ukuba ngumzali.
Kubalulekile ukuqonda kanzulu izigaba zokukhula, kubalulekile ukuthi noma yimuphi umuntu ophilayo angene kuzo aphinde aphile kuzona ngokwanele ngoba zidalelwe ukuthi zimqeqeshele leso sigaba sempilo esisuke sizolandela.
Uma umuntu engaqeqeshekanga ngokwanele kunoma yisiphi isigaba sempilo, ayanda amathuba okuthi kuleso esilandelayo afike entekenteke kuso ngenxa yokuthi usuke eqe ezinye izimfundiso obekumele azithole kuleso sigaba ngokwanele.
Okunye okubalulekile kulolu daba, umqondo wengane esuke isikhulelwe. Umqondo wengane usuke usezingeni lobungane, ngakho-ke ngalesi sikhathi ikhulelwa isuke ingakakulungeli ngokwanele ngokomqondo ukuthi ibhekane nomsebenzi ojulile wokuba ngumzali, angisayiphathi-ke eyokubhekana nezinselelo abazali ababhekana nazo ekukhulisweni kwezingane.
Usungabheka ubone ukuthi umthelela walobuntwana bomqondo wengane ekhulelwe uzoba namuphi umonakalo empilweni yengane ezozalwa.
Ngifisa singakushalazeli ukuthi le ngane esencane ekhulelwe iba nengcindezi yokukhulelwa kukodwa, iphinde ixakwe nayisimo ebhekana naso kubo kubazali nasemalungeni omndeni wayo athukutheliswa yisenzo sayo sokukhulelwa.
Kwesinye isikhathi kuba nenselelo yokuthi mhlawumbe noyise wengane, naye oyingane kumbe omdala, uzongayiniki ukwesekwa okulindelekile bese yonke le mithwalo iyicindezela le ntombazanyana ebisazifuna kwayona empilweni ukuthi ingubani.
Yonke le mithwalo kayilula nakancane empilweni yale ngane ikakhulukazi emqondweni wayo.
Into engikhathaza kakhulu nangokwedlulele, ile ngane eza-lelwa ngaphansi kwazo zonke lezi zinselelo. Lapho engifika ngiphazamiseke khona kakhulu isekutheni ukwanda kwaba-ntwana abazalwa yizingane, bu-sibekaphi isizwe nekusasa laso!!
Kungabukeka njengomkhuba osewujwayelekile nosekungathi uyemukeleka kodwa iqiniso ukuthi kakwanele ukubona ingane ikhula ngomzimba kepha ibe ilimele ingqondo nendlela yokucabanga.
Ngifisa ukuchoma uphaphe lwegwalagwala kuzona zonke izinhlaka ezisagqugquzela ukuthi kugwenywe ukukhulelwa kwezingane zingakavuthwa. Lezi zinhlaka zinika ithemba lokuthi bakhona abayibonayo le ngozi yokwanda kwabantwana abakhuliswa ngabazali abalimele nabagcwele intukuthelo nokudideka.
Okuhle ukuthi lezi zinhlaka kazigcini ngokuyibona ingozi, kunalokho ziyazama ukusukuma zilwele ukuthi lo mkhokha unqandwe uze uvalwe. Bengifisa sengathi banganda abantu abasukumela ukwenza umehluko ekutheni kuliwe nalolu bhubhane kunqandwe lo mkhokha omubi obunisa izimbali zesizwe zingakaqhakazi nangokwanele.
Kungenzeka kubukeke kungenamsebenzi kwabanye ukulwa nalo mkhokha, kodwa kudinga ukudlelwa amathambo engqondo ngokujulile kubukisiswe ukuthi isizwe sikhubazeka kangakanani ngokuzalwa kwabantwana ngale ndlela.
•Umakhosi uNdleleni uMaZulu Wesigodlo Insika Uneziqu ze: Masters in Education Leadership Management and Policy Pschology with interest in Child Development and Parenting services Wayenguthishanhloko eMatatane Secondary School Umbhali nomeluleki ngesintu namakhaya Utholakala ku: bonamazulu@ gmail.com
Ucingo: 076 265 1164