KUBUYE ITHEMBA KWI-MARITZBURG UTD INQOBA EKUHAMBENI
IQINISE amathuba okulwela ngempumelelo ukubuyela kwiDStv Premiership iMaritzburg United ishaya iMagesi FC ngo-2-0 koweMotsepe Foundation Championship (MFC) ngoMgqibelo ePolokwane.
Amagoli ezikaFarook “Ntshebe” Kadodia avalelwe enethini nguAndiswa Sithole noJoslin Kamatuka.
Ekhuluma neLANGA izolo ngeSonto uKadodia ongusihlalo weTeam of Choice, uthi yize engafuni ukufaka abadlali ngaphansi kwengcindezi kodwa usebuyelwe yithemba lokuthi bazokwazi ukuqhubeka nomgqigqo omuhle abahamba ngawo. Uthe okubalulekile wukubhekana nezinselelo zomdlalo ngamunye.
“Ngihlabeke umxhwele ngezinga elikhonjiswe ngabadlali bami. Sengimincele ukuthi baqhubeke nokwenza kahle. Makhulu amathuba okuthi bangakwazi ukufeza iphupho lethu lokubuyela kwiDStv Premiership ngesizini ezayo.
“Kufanele sizame ukudlubulundela ukuthola amaphuzu agcwele kule midlalo esele. Umdlalo wethu neVenda umqoka ngaphezu kokwenza. Ngenhlanhla siyayazi ukuthi iphetheni. Ngikholwa wukuthi umqeqeshi wethu (uSimo Dladla) uzokwazi ukuyihlelela ngendlela,” esho.
* IMilford FC ithole iphuzu ibanjwa yiNB La Masia ngo-0-0 koweligi ngoMgqibelo ePrincess Magogo Stadium, KwaMashu.
UDkt Xanti Pupuma ongumnikazi weMilford FC, uthi yize bekungafanele bathole iphuzu elilodwa kepha usenalo ithemba lokuthi bazokwazi ukugwema ukugencwa yizembe. Uthi kulo mdlalo abadlali bakwenze konke kepha kwanqaba yona inhlanhla. Uthi umincele ukuthi banqobe uma sebebhekene neCasric Stars.
* Imidlalo yeMotsepe Foundation Championship (MFC) ezogijinywa phakathi nesonto imi kanje:
KUSASA NGOLWESIBILI
E-Olympia Park: Orbit College vs Hungry Lions 15h00. EThohoyandou: Venda FC vs Maritzburg United 15h00. EMxolisi Dicksy: Upington City vs Baroka FC 15h00.
NGOLWESITHATHU
E-Isak Steyl: Marumo Gallants vs Black Leopards 15h00.
E-Absa Tuks: University of Pretoria vs JDR Stars 15h00.
EPrincess Magogo: Milford FC vs Casric Stars 15h00.
E-Olen Park: Platinum City Rovers vs Magesi FC 15h00.
EDobsonville: NB La Masia vs Pretoria Callies 15h00.
mfanafuthin@ilanganews.co.za