OweChippa umincele ukwelulama kwezethenjwa ngaphambi koweBucs
UMINCELE ukuba kubuye izethenjwa zakhe ezilimele uKwanele Kopo ongumqeqeshi weChippa United ngokuhlanganyela noThabo September ababambisene kahle naye njengoba nemiphumela ibonakala.
IChippa yehlulwe AmaZulu FC ngo-2-1 koweDStv Premiership ngoMgqibelo eMoses Mabhida Stadium, eThekwini.
IChilli Boyz yiyona ethole igoli kuqala ngonyawo lukaSinoxolo Kwayiba ngomzuzu ka-8 emuva kwephutha elenziwe nguCelimpilo Ngema ophisane ngebhola endaweni eyingozi.
Amagoli oSuthu ashaywe nguTshepang Moremi ngomzuzu ka-65 okube yigoli elishiye abalandeli bebhola bengawuvali umlomo kwazise ulishaye efulathele ipali. Elesibili kube yiphenathi eshaywe nguHendrick Ekstein olokhu eqhubeka nokukhombisa ukubuyelwa yifomu aduma ngayo esedlala kwiKaizer Chiefs.
Ekhuluma emuva kokuguqa kwezakhe uKopo, uyivumise okwendoda induku njengoba ethe ukholwa wukuthi uSuthu belungenhla kwabo kulo mdlalo. “Siwuqale kahle umdlalo sathola negoli kuqala. Emuva kwalokho silinyalelwe nguGoodman Mosele noCraig Martin engikholwa wukuthi yikhona okusidonsele amanzi ngomsele njengoba kuvele kwanyomfeka zonke izinhlelo zethu. “Ngiyawabongela AmaZulu, akhombisile ukuthi akulambele ukunqoba njengoba abesihlasela ngamandla. “Izinto zethu kazihambi kahle njengoba simincele ukuthi abanye abadlali babe yimiqemane ngaphambi komdlalo wethu owandulela owamanqamu weNedbank Cup esizowugijima neOrlando Pirates ngempelasonto okuwumdlalo obaluleke kakhulu ngoba nathi siyafisa ukuyodlala owamanqamu. “Kodwa kuzofanele singajahi phambili njengoba kumele siqale sibhekane neSwallows ngoLwesibili (kusasa) bese siyaqala sihlelela umdlalo olandelayo,” kusho lo mqeqeshi ozwakalise enkulu injabulo njengoba bengekho embangweni wokuvika izembe kule sizini okuyinto ejwayele ukuhlupha le kilabhu kaSiviwe “Chippa” Mpengesi odume ngokungananazi ukukhomba indlela abaqeqeshi.