UMokwena uzicelele 'ukungaxoshwa' kwiSundowns
Izodudulana nezingqungqulu zomhlaba kwiFifa Club World Cup
USHAYWE wakhumbuza abathandi bakanobhutshuzwayo bakuleli iminyaka yakhe uRulani Mokwena ongumqeqeshi weMamelodi Sundowns iwashiswa ijezi yi-Esperance Tunis yaseTunisia kwiCaf Champions League.
IDowns iphinde yakhombisa ukuba buthuntu phambi kwamapali ihlulwa yi-Esperance ngo-1-0 emlenzeni wesibili we-semi final yalo mqhudelwano ngoLwesihlanu ebusuku eLoftus Stadium, ePitoli.
Kube wu-2-0 sekuhlanganiswa imilenze yomibili njengoba yadliwa ngo-1-0 ekuhambeni.
Ikhubeke esigabeni esifanayo nesangesizini edlule ikhishwa kabuhlungu yiWydad Casablanca yaseMorocco.
Emuva komdlalo ngoLwesihlanu, uMokwena uzithethelele ngeminyaka yakhe, wathi ukholwa wukuthi usazoyinqoba iChampions League.
“Into abantu abayikhohlwayo ebholeni laseNingizimu Afrika – abayikhumbula kuphela uma kuthanda bona – wukuthi ngineminyaka ewu-37.
“Wunyaka wami wokuqala lona ngiwumqeqeshi ozimele weMamelodi Sundowns.
“Ngike ngabambisana nomunye umqeqeshi (uManqoba Mngqithi) iminyaka emithathu, sanqoba iNedbank Cup, iMTN8, nenkomishi yase-Afrika. “Ngiyaziqhenya ngokuthi ngibe nesandla ukuletha okuthile (izicoco) kule kilabhu. “Ngiyazicelela (ukungaxoshwa), ngisafuna ukuhlala kule kilabhu, kukhulu engisazoyenzela kona. “Ngelinye ilanga ngizoyinqoba iChampions League, lokho kangikungabazi,” esho. Nakuba iSundowns iphumile kulo mqhudelwano, ezimnandi wukuthi ingenye yamakilabhu amane azomela izwekazi i-Afrika emqhudelwaneni iFifa Club World Cup ngonyaka ozayo. Lo mqhudelwano ohlanganisa amakilabhu awu-32 avela emlabeni-jikelele uzoqala ngomhla ka-15 kuNhlangulana (June) usongwe ngomhla ka-13 kuNtulikazi (July). *KWENYE i-semi final yalo mqhudelwano, i-Al Ahly yaseEgypt ishaye ngo-3-0 iTP Mazembe yaseDR Congo ngoLwesihlanu ebusuku eCairo. I-Esperance yiyona ezosingatha umlenze wokuqala womdlalo wamanqamu (ne-Al Ahly) ozokuba ngomhla ka-13 kuNhlaba (May).
* Khonamanjalo, iSundowns izobhekana neTS Galaxy kowe-DStv Premiership namuhla ngoMsombuluko ngo-19h30 eLoftus.
ilanganews.co.za