LILENGELA EWENI IKUSASA LIKA-HUNT
LILENGELA eweni ikusasa likaGavin Hunt ongumqeqeshi weSuperSport United njengoba kuvela ukuthi abaphathi bayo sebemnqumele ugwayi katiki.
ISuperSport iguqiswe yiKaizer Chiefs ngo-2-1 koweDStv Premiership ngoMgqibelo ebusuku ePeter Mokaba Stadium, ePolokwane.
Amagoli eChiefs ashaywe nguChristian Saile noMduduzi Shabalala, kwathi eleSuperSport labhakuziswa nguTerrence Dzvukamanja obekuyiphenathi.
ILANGA lithole ngemithombo yalo ukuthi uHunt usehleli ngesinqe esisodwa emuva kokuba abaphathi bekilabhu bemyalele ukuba aguqule izinto ngokushesha, kungenjalo ibhantshi lizogcwala umoya kuyena.
Emidlalweni emihlanu edlule, iSuperSport isishaywe kwemine yadlala ngokulingana kowodwa.
Umthombo weLANGA uthe: “Zibaliwe izinsuku zikaHunt kwiSuperSport uma imiphumela iqhubeka nokungamvumi.
“Abaphathi bamyalele ukuba ashintshe izinto ngokushesha, kungenjalo uzophuma ngesango.
“Into ephatha kabi abaphathi wukuthi le miphumela engemihle ibonela igama labo kubaxhasi njengoba bebelokhu bengena ngamandla kule kilabhu.
“Uma isimo siqhubeka kanjena, uHunt angazithola engasenawo umsebenzi.”
Lo mqeqeshi uzwakalise ukukhathazeka ngesimo sekilabhu nangekusasa lakhe.
“Noma yimuphi umqeqeshi angakhathazeka uma isimo sinjena, nami ngikhathazekile nangesimo sami uqobo.
“Sikwenza konke enkundleni, inkinga yibhola elingafuni ukungena enethini.
“Kulo mdlalo sithole inqwaba yamathuba, saze sashaya nepali, kodwa lutho igoli.
“Kufanele sizame ukushintsha izinto uma sesibhekene neRoyal AM. Yiwona mdlalo okufanele siphendule ngawo amatafula.”
ISuperSport izobhekana ne-AM koweligi kusasa ngoLwesibili ngo-19h30 eHarry Gwala Stadium, eMgungundlovu.