SEYIHLELIWE INDAWO YOKULALISA ABAGIJIMI ABAHLWEMPU KWI-COMRADES MARATHON
MZWAMANDLA ZONDI
ABAGIJIMI abangasebenzi nabahola kancane bazotholelwa indawo yokulala mahhala ngosuku lweComrades Marathon.
IComrades yanonyaka izokuba ngomhla ka-9 kuNhlangulana (June) isukela eThekwini isongwe eMgungundlovu.
IComrades Marathon Association (CMA) ihlangene noGovernment Employee Medical Scheme (GEMS), bathembisa ukusiza abasubathi abantulayo ngendawo yokufihla ikhanda ngosuku olwandulela lo mjaho.
Le ndawo isedolobheni eMgungundlovu ku-Alan Paton Road ngemuva kweSasol Garage, kanti iphakathi kweCity Hall neScottsville Mall. Kulolu hlelo kusizakala abasubathi abahola imali esuka ku-R6 000 kuya phansi nabangasebenzi. Kuthiwa kuphephile kule ndawo.
Kuzokhumbuleka ukuthi phambilini abasubathi bebelala emigwaqweni abanye belala eKings Park Athletics Stadium.
Kule ndawo abasubathi kufanele bafike mhla ka-8 kanti bazohamba uma kuphela umjaho. Lapho bezolala khona kukhona ukudla, kanti nasekuseni ngaphambi kokuba bahambe bahlelelwa ukudla ukuze bakwazi ukumelana nobunzima balo mjaho.
Ngosuku lomjaho bazothathwa ngovivi bayiswe lapho uqala khona eThekwini. Abafuna ukuthola lolu sizo kumele bathumela i-payslip eqinisekisa ukuthi bahola malini, kanti abangasebenzi kufanele benze incwadi efungelwe emaphoyiseni eqinisekisa ukuthi kabatholi lutho. Lezi zinto kumele zithunyelwe kwi-email ethi: sifiso@ comrades.com.
Sisekuzo ezeComrades, kuthiwa uMnyango wezeMidlalo wesifundazwe oholwa nguDkt Ntuthuko Mahlaba, nonyaka uthembise ukukhokhela abasubathi baKwaZuluNatal abathathu besilisa nabesibalo esifanayo kwabesifazane abazokwenza kahle kulo mjaho.
Kuzokhumbuleka ukuthi phambilini umnyango ubukhokhela umsubathi wokuqala kuphela wesifundazwe kubona bobubili ubulili ukuqeda umjaho.